Water Storage : नांदेडच्या ८० लघू प्रकल्पांमध्ये केवळ ४५% पाणी शिल्लक

Nanded News : जिल्ह्यात तापमानामुळे पाण्याचे बाष्पीभवन वाढले आहे. यासह शेतीसिंचनासाठी पाणी सोडण्यात आल्यामुळे जिल्ह्यातील पाणीसाठ्यात झपाट्याने घट होत आहे. जिल्ह्यातील ८० लघू प्रकल्पातील पाणीसाठा ४५ टक्क्यांपर्यंत घसरला आहे.

सध्या एकूण १०४ प्रकल्पात ४१७.९८ दशलक्ष घनमीटरनुसार ५७.१४ टक्के पाणीसाठा शिल्लक आहे, अशी माहिती नांदेड पाटबंधारे विभागाकडून देण्यात आली. जिल्ह्यात मागील वर्षी पावसाळ्यात झालेल्या दमदार पावसामुळे संपूर्ण प्रकल्पात शंभर टक्के पाणीसाठा झाला होता.

यामुळे जिल्ह्यातील सर्वच १०४ प्रकल्पात समाधानकारक पाणीसाठा झाला होता. परंतु यंदा तापमानात झालेली वाढ यामुळे पाण्याचे बाष्पीभवन होत आहे. तसेच शेतीसिंचनासाठी पाणी पाळ्या देण्यात आल्याने पाणीसाठ्यात झपाट्याने घट झाली आहे. आजघडीला जिल्ह्यात मोठा प्रकल्प असलेल्या विष्णुपुरी प्रकल्पात सध्या प्रकल्पात ४९.५९ दलघमीनुसार ६१.३८ टक्के पाणीसाठा शिल्लक आहे.

तर दुसरा मोठा प्रकल्प असलेल्या मानार (बारुळ) प्रकल्पात ८६.९१ दलघमीनुसार ६२.८८ टक्के पाणीसाठा आहे. यासोबतच जिल्ह्यातील नऊ मध्यम प्रकल्पात ८७.०६ दलघमीनुसार ६२.६० टक्के पाणीसाठा आहे. चार कोल्हापुरी बंधाऱ्यात ०८ दलघमीनुसार १.८ टक्के पाणीसाठा आहे, ८० लघू प्रकल्पात ७९.८२ दलघमीनुसार ४५.९६ टक्के पाणीसाठा आहे.

नऊ उच्च पातळी बंधाऱ्यात ११४.९२ दलघमीनुसार ६०.५५ टक्के पाणीसाठा आहे. जिल्ह्यात एकूण १०४ प्रकल्पात २२०.३० दशलक्ष घनमीटरनुसार ३०.२६ टक्के पाणीसाठा शिल्लक आहे. नांदेड जिल्ह्याशेजारी असलेल्या परभणीतील येलदरी प्रकल्पात ६४५.५१ दलघमीनुसार ७०.७२ टक्के पाणीसाठा आहे. तर सिद्धेश्‍वर प्रकल्पात ५१.१० दलघमीनुसार ६३.१२ टक्के पाणीसाठा आहे. यवतमाळच्या ऊर्ध्व पैनगंगात (इसापूर) ७९.२३ टक्के पाणीसाठा आह.

नांदेड पाटबंधारे मंडळातील प्रकल्पनिहाय पाणीसाठा

प्रकल्प दलघमी टक्के

विष्णुपुरी ४९.५९ ६१.३८

मानार ८६.९१ ६२.८८

मध्यम प्रकल्प (९) ८७.०६ ६२.६०

लघू प्रकल्प (८०) ७९.८२ ४५.९६

उच्चपातळी बंधारे (९) ८७.०६ ६२.६०

एकूण प्रकल्प १०४ ४१७.९८ ५७.४१

जिल्ह्याशेजारील प्रकल्प

येलदरी ६४५.५१ ७९.७२

सिद्धेश्‍वर ५१.१० ६३.१२

इसापूर ७६३.८६ ७९.२३