Nashik DCC Bank : जिल्हा बँकेची सामोपचार कर्ज परतफेड योजना लागू

Nashik News : जिल्हा मध्यवर्ती सहकारी बँकेच्या थकबाकीदार सभासदांसाठी नवीन सामोपचार कर्ज परतफेड योजना लागू झाली. सर्वसाधारण सभेत सादर झालेल्या या योजनेला पुढील मंजुरी मिळाल्यावर शनिवारपासून (ता. २) ही योजना लागू झाली आहे. थकित रकमेनुसार टप्पेनिहाय व्याजदर लागू असतील. योजनेत सहभागासाठी थकबाकीदारांना ३० सप्टेंबरपर्यंत संधी असेल.

बँकेचे व्यवस्थापकीय सल्लागार विद्याधर अनास्कर यांच्या अध्यक्षतेखाली ४ जूनला महाकवी कालिदास कलामंदिर येथे जिल्हा मध्यवर्ती सहकारी बँकेची सभा घेतली होती. या सभेत सामोपचार कर्ज परतफेड योजनेसंदर्भात प्रस्ताव मांडला होता. हा प्रस्ताव ‘नाबार्ड’ आणि सहकार आयुक्तांकडे मंजुरीसाठी पाठविला होता.

त्याला मंजुरी दिल्यानंतर कर्ज सामोपचार योजना लागू झाली आहे. नाशिक जिल्हा बँकेने शनिवारी (ता. २) प्रसिद्ध केलेल्या परिपत्रकानुसार थकबाकीदार सभासदांकरिता नवीन सामोपचार कर्ज परतफेड योजना २०२५-२६ लागू केली आहे.

या योजनेत ३० जून २०२२ अखेर थकबाकीदार सभासद पात्र राहातील. थकबाकीदार सभासदांनी सामोपचार कर्ज परतफेड योजनेत सहभाग नोंदविण्यासाठी जिल्हा बँकेच्या नजीकच्या शाखेशी संपर्क साधावा. जास्तीत जास्त सहभाग घेऊन थकबाकीचा भरणा करून भविष्यातील कायदेशीर कारवाई टाळावी, असे आवाहन बँकेचे प्रशासक संतोष बिडवई यांनी केले.

मृत कर्जदार सभासदांसाठी वारसांनी प्रस्ताव मंजुरीच्या तारखेपासून एक महिन्याच्या आत योजनेनुसार एनपीए तारखेपर्यंत प्रचलित व्याजदराने होणारे एकूण व्याज व सर्व वसुली खर्चासह भरणा करणे आवश्यक आहे. एनपीए तारखेनंतरचे व्याज माफ केले जाईल, असे स्पष्ट केले आहे. योजनेत कर्जखाते निरंक झालेले सभासद बँकेकडून किंवा संस्थेकडून अल्प मुदत कर्ज घेण्यास पात्र राहातील. एक वर्षाच्या कालावधीनंतर मध्यम मुदत, दीर्घ मुदत कर्ज घेण्यास पात्र राहतील.

थकित रकमेवर टप्पेनिहाय व्याजदार असे

सभासदांकडील एकूण थकित रक्कम विचारात घेऊन एनपीए तारखेपासून टप्पेनिहाय व्याजदार निश्चित केले आहेत. १ लाखापर्यंत १ टक्का, १ ते ५ लाखांपर्यंत ४ टक्के, ५ ते १० लाखांपर्यंत ५ टक्के आणि १० लाखांपेक्षा अधिकच्या कर्ज रकमेवर ६ टक्के व्याजदर लागू राहील. पात्र सभासदांनी सामोपचार योजनेनुसार एकूण रकमेच्या दहा टक्के रक्कम भरून ३० सप्टेंबरपर्यंत योजनेत सहभाग नोंदवावा.

केंद्र कार्यालयाकडून योजनेचे मंजुरीपत्र मिळाल्यानंतर ३० दिवसांच्या आत १५ टक्के रकमेचा भरणा करायचा आहे. उर्वरित ७५ टक्के रक्कम ३१ मार्च २०२६ पर्यंत भरणा करावयाची आहे. या मुदतीत उर्वरित भरणा न झाल्यास संबंधित थकबाकीदाराने भरलेली रक्कम व्याजात जमा केली जाईल.

शिल्लक थकबाकी वसुलीसाठी कायदेशीर कारवाई केली जाईल. गैरव्यवहार किंवा बँकेची फसवणूक करून कर्ज उचल केलेल्या थकबाकीदाराकडून सुरुवातीस प्रचलित पद्धतीने व एनपीए तारखेनंतर दहा टक्के दराने व्याज आकारणी करण्यात येईल.