Kisan Credit Card : किसान क्रेडिट कार्डधारकांची संख्या वाढणार

Amaravati News : अर्थसंकल्पात शेतकऱ्यांसाठी असलेल्या किसान क्रेडिट कार्डची मर्यादा तीनवरून पाच लाख रुपये करण्यात आली आहे. याचा जिल्ह्यातील ९६ हजार कार्डधारक शेतकऱ्यांना लाभ मिळणार असून तीन लाख रुपयांपर्यंत व्याज सवलत देण्यात आली आहे. यामुळे आगामी काळात कार्डधारकांची संख्या वाढण्याची शक्यता आहे.

शेतकऱ्यांना शेतीच्या पूर्व मशागतीसह पेरणी, बी-बियाणे, कीटकनाशके अशा कृषी निविष्ठा खरेदी करता याव्यात, यासाठी किसान क्रेडिट कार्ड योजना लागू करण्यात आली आहे. बॅंकांचे कर्जदार सभासद असलेल्या शेतकऱ्यांना क्रेडिट कार्ड देण्यात येतात.

नुकत्याच सादर झालेल्या अर्थसंकल्पात किसान क्रेडिट कार्डची मर्यादा पाच लाख रुपयांवर वाढविण्यात आली आहे. आतापर्यंत ही मर्यादा तीन लाख रुपये इतकी होती. नव्याने वाढविण्यात आलेल्या मर्यादेत आता शेतकऱ्यांना तीन लाखांपर्यंत रक्कम घेतल्यास त्यावर व्याज लागणार नाही.

त्यांना शून्य टक्के व्याजदराची सवलत योजना लागू करण्यात आली आहे. त्यानंतर उचलण्यात येणाऱ्या रकमेवर सात टक्के व्याज आकारण्यात येणार असून यातील एक टक्का व्याज सरकार भरणार आहे. उर्वरित सहा टक्के व्याज शेतकऱ्यांना भरायचे आहे.

अमरावती जिल्ह्यात किसान क्रेडिट कार्डधारकांची संख्या जवळपास ९६ हजार इतकी आहे. त्यामध्ये २१ हजार ८७२ शेतकरी जिल्हा मध्यवर्ती सहकारी बॅंकांचे सभासद आहेत तर उर्वरित विविध बॅंकांचे सभासद आहेत. क्रेडिट कार्डची मर्यादा वाढविण्यात आल्याने या शेतकऱ्यांना अतिरिक्त लाभ घेता येणार आहे.

कृषी क्षेत्राशी संबंधित खर्चासाठी वापर करा

किसान क्रेडिट कार्डवर मिळणाऱ्या रकमेचा वापर कृषी निविष्ठा खरेदी करण्यासाठी किंवा शेतीशी संबंधित कामांकरिताच करावा, असे आवाहन जिल्हा उपनिबंधक यांनी केले आहे. आता मर्यादा वाढविण्यात आल्याने शेतकऱ्यांना खर्चासाठी अतिरिक्त निधी उपलब्ध झाला आहे. मात्र त्याचा वापर काटेकोरपणे केल्यास शेतकऱ्यांना लाभ होऊ शकणार आहे.