Rummy Viral Video: रमी खेळल्याचा आरोप बिनबुडाचा

Nashik News: कुठेही चौकशी करा, ऑनलाइन रमी सुरू झाल्यापासून एक रुपयाची रमी खेळलो नाही. मला रमी खेळता येत नाही. मात्र विरोधकांकडून रमी खेळण्याबाबत होणारा हा आरोप चुकीचा आणि बिनबुडाचा आहे, असे स्पष्टीकरण कृषिमंत्री माणिकराव कोकाटे यांनी दिले.

पावसाळी अधिवेशनादरम्यान सभागृहात ऑनलाइन रमी खेळत असताना कोकाटे यांचा व्हिडिओ व्हायरल झाल्यानंतर त्यांच्यावर राज्यभर टीकेची जोड उठली. शेतकऱ्यांकडून राजीनामाची मागणीदेखील होत आहे. याच पार्श्‍वभूमीवर कोकाटे यांनी नाशिक येथे पत्रकार परिषद घेऊन भूमिका मांडली. श्री. कोकाटे म्हणाले, ‘‘हा खूप छोटा विषय आहे, तो एवढा का लांबवला, मला माहीत नाही.

यापूर्वीही यावर खुलासा केला आहे. ऑनलाइन रमी खेळण्यासाठी मोबाइल क्रमांक जोडलेला असावा लागतो, त्याला बँकेचे अकाउंटही संलग्न करावे लागते. माझे बँक खाते, मोबाइल क्रमांक तपासा, माझा मोबाइल, बँक खाते त्याला कनेक्ट नाही, मी एक रुपयाचीही रमी खेळलो नाही. माझ्यावर करण्यात आलेले सर्व आरोप हे बिनबुडाचे आहेत. मी फक्त जाहिरात स्कीप करत होतो त्या वेळचा तो व्हिडिओ आहे.’’

कोकाटे यांच्यावर पत्ते फेकण्याचा प्रयत्न

कृषिमंत्री माणिकराव कोकाटे नाशिक रोड येथे एका कार्यक्रमाला आले असता त्यांच्यावर येथील दुर्गा उद्यान मंदिराजवळ पत्ते फेकण्याचा प्रयत्न शिवसेनेच्या (उद्धव बाळासाहेब ठाकरे गट) पदाधिकाऱ्यांकडून करण्यात आला. या प्रकरणी पोलिसांनी शिवसेनेचे उपजिल्हाप्रमुख भय्या मणियार यांच्यासह तीन ते चार शिवसैनिकांना अटक केली. या वेळी शिवसेना ठाकरे गट व राष्ट्रवादी काँग्रेस अजित पवार गट यांच्या कार्यकर्त्यांत घोषणायुद्ध झाले. या वेळी पोलिस बंदोबस्त असल्याने पुढील अनर्थ टळला.

दोषी आढळलो, तर राजीनामा देईन

मला बदनाम करण्याचा विरोधकांचा हा डाव आहे. ज्यांनी मला बदनाम केले त्यांना मी कोर्टात खेचणार, असे श्री. कोकाटे यांनी सांगितले. मी कुणाचा विनयभंग केला आहे का? राजीनामा देण्याचे काय कारण, असे सांगत राजीनामा देणार नसल्याचे त्यांनी सांगितले. या प्रकरणाची चौकशी करण्याचे पत्र मी देणार असल्याचे त्यांनी सांगितले. यात मी दोषी आढळलो तर मी राजीनामा देईन, असे ते म्हणाले.