Matlai Ware : मतलई वारे आंबा बागायतदारांच्या पथ्यावर

Ratnagiri News : किमान तापमानात घट झाल्याने आणि अरबी सागरात चक्रीय वाऱ्याची स्थिती प्रभावी ठरल्याने बुधवारी (ता.१३) रात्रीपासूनच कोकण किनारपट्टी भागात शीतलहरी सक्रिय झाल्या आहेत. त्यामुळे कोकणात थंडीची हलकी चाहूल सुरू झाली आहे.

पुढील काही दिवसांत तापमानात दोन ते तीन अंशांची घट होईल, असा अंदाज हवामान विभागाने वर्तविला आहे. मतलई वारे आंबा बागायतदारांच्या पथ्यावर पडणार आहेत. मोहोर येण्याची प्रक्रिया वेगाने होईल, असा अंदाज व्यक्त केला जात आहे.

सध्या कोकण किनारपट्टी भागात काही दिवसांपासून ढगाळ हवामान असून वातावरणात सतत चढ-उतार सुरू आहे. जिल्ह्यातील वातावरणात घट झाल्याने धुक्यासह दव पडत आहे. तर काही ठिकाणी ढगाळ वातावरण असल्याने पहाटे गारठा, तर दुपारी उकाडा अनुभवायला मिळत आहे. येत्या काही दिवसांत थंडी हळूहळू वाढत जात आहे. रत्नागिरीसह किनारी भागात हलका गारठा जाणवू लागला.

मागील आठवड्यात तापमापकावरील पारा खाली घसरला होता. कमाल तापमान २९ अंश सेल्सिअस एवढे नोंदविले गेले असून दिवसा मात्र उकाडा कायम आहे. नागरिकांना पहाटे गारवा आणि दुपारी उकाडा अशा संमिश्र हवामानाला तोंड द्यावे लागत आहे. हवामान विभागाच्या कुलाबा केंद्रात रत्नागिरी शहर आणि ग्रामीण भागातील किमान तापमान २१.५ अंश सेल्सिअस तर कमाल ३०.८ अंश सेल्सिअस नोंदले गेले आहे.

गेल्या दोन दिवसांत १ अंशाने किमान तापमान घटले आहे. डिसेंबर महिन्याच्या शेवटच्या दिवसांमध्ये जोरदार थंडी जाणवण्याची शक्यता हवामान विभागाने वर्तविली आहे. आंबा मोहोराची प्रक्रिया सध्या सुरू आहे. फवारणीचे काम आंबा बागायतदारांकडून सुरू आहेत. या फवारणीला थंडीची जोड मिळावी, अशी अपेक्षा आंबा बागायतदारांची आहे.

मागील दोन दिवसांपासून थंडीचा जोर वाढू लागल्याने आंबा बागायतदार सुखावले आहेत. तसेच मतलई वारे वाहू लागल्यामुळे आंबा बागांमधील मोहोर वेगाने येण्याच्या प्रक्रियेला जोर धरेल. यंदा मोहोर चांगला आला आहे. त्यामुळे उत्पादन चांगले मिळेल अशी आशा व्यक्त केली जात आहे.