Cow Dairy Farm : देशी गायींसाठी लवकरच विशेष दुग्धशाळा : गोसेवा आयोग अध्यक्ष शेखर मुंदडा

Nashik News : गोमातेचे संवर्धन करणे हीच गोसेवा आयोगाची प्राथमिकता असून, राज्यात गो-साक्षरता आणि गो-पर्यटन या माध्यमातून गायींच्या संवर्धनाचे काम करण्यात बरोबरच राज्यात देशी गायींसाठी विशेष दुग्धशाळा निर्माण करण्यात येणार असल्याची माहिती महाराष्ट्र गोसेवा आयोगाचे अध्यक्ष शेखर मुंदडा यांनी दिली.

येथील सरस्वती विद्या मंदिर विद्यालयात महाराष्ट्र गोसेवा समितीचे अध्यक्ष शेखर मुंदडा सदिच्छा भेटीसाठी आले होते. या वेळी संवाद मेळावा घेण्यात आला. डॉ.मधुकर आचार्य अध्यक्षस्थानी होते. अॅड. गोरक्षनाथ चौधरी, आयोगाचे सदस्य वर्मा, दुर्गेश दायमा आदींची प्रमुख उपस्थिती होती.

गोमातेचे संरक्षण संवर्धन व संगोपन या आयोगाच्या संकल्पना आहेत. गोमातेस राज्यमातेचा दर्जा देणारे भारतातील महाराष्ट्र हे पहिले राज्य आहे. गोमातेचे संरक्षण ही सर्वांची सामुदायिक जबाबदारी आहे. समर्पण असल्याखेरीज काहीही मिळत नाही. गोरक्षण ही आपली जबाबदारी आहे. गोरक्षेसाठी येणाऱ्या अडचणी सोडविण्यासाठी राज्य गोसेवा आयोग सहकार्य करेल, अशी ग्वाही मुंदडा यांनी दिली.

या कार्यक्रमासाठी वणी भाजप मंडळ अध्यक्ष किरण तिवारी, मंडळ सरचिटणीस दर्शन दायमा, कृष्णा घुले, रोशन समदडिया, बाळासाहेब देशमुख, सुरेश वर्मा, दुर्गेश चितोडे, पप्पू चंद्रात्रे, डॉ. राघवेंद्र भुतडा, गोकूळ पालखेडे, जयसिंग राजपुरोहित, किशोर बोरा, अनिल गांगुर्डे, प्रवीण गायकवाड, पंकज शिवले, मोहन देशमुख, वैभव घडवजे, प्रीतेश खाबिया, रोमित बोरा, जितू लिंबानी, संतोष कोंड, मनोज थोरात, कमलेश शर्मा आदींसह मान्यवर उपस्थित होते.