Lumpy Skin Disease: सोलापुरात ‘लम्पी’चा संसर्ग वाढला; संपूर्ण जिल्हा नियंत्रित क्षेत्र घोषित

Solapur News: सोलापूर जिल्ह्यात एक हजार ३० पशुधन लम्पी बाधित होते. त्यापैकी १७ पशुधनांचा मृत्यू झाला असून, ७२१ पशुधन बरे झाले आहेत. सध्या २९२ पशुधन लम्पी बाधित आहेत. त्यांच्यावर उपचार सुरु आहेत. तुलनेने ही संख्या कमी असली, तरी खबरदारी म्हणून संपूर्ण सोलापूर जिल्हा नियंत्रित क्षेत्र घोषित करण्यात आला आहे. प्रभारी जिल्हाधिकारी कुलदीप जंगम यांनी यासंबंधीचा आदेश काढला आहे.

जिल्ह्यात उपचारानंतर पशुधन बरे झाले असले, तरी नऊ तालुक्यांत रोगाचे संसर्ग केंद्र आढळले आहेत. तर पशुसंवर्धन आयुक्तालयाने दिलेल्या मार्गदर्शक सूचनानुसार पशुधन बाधित केंद्राच्या पाच किलोमीटर परिसरात लसीकरणाच्या सूचना देण्यात आल्या आहेत. त्यानुसार जिल्हा पशुसंवर्धन विभागाने जिल्हाधिकारी यांच्याकडे नियंत्रित क्षेत्र घोषित करण्याबाबत प्रस्ताव पाठवला होता.

त्यानुसार हा निर्णय प्रभारी जिल्हाधिकारी जंगम यांनी घेतला आहे. या निर्णयानुसार लम्पी बाधित परिसरातील गोवर्गीय पशुधनास गोट पॉक्स लसीकरण केले जाते. विशेषतः गोवर्गीय पशुधनाची ने-आण करताना २८ दिवसांपूर्वी गोट पॉक्स लसीकरण बंधनकारक असणार आहे. त्यासाठी गोट पॉक्स लसीकरण प्रमाणपत्र सोबत बाळगणे बंधनकारक करण्यात आले आहे.

बाधित पशुधनाच्या संपर्कातील वैरण, गवत, साहित्य, कातडी आदी नियंत्रित क्षेत्रातून बाहेर नेण्यास मनाई करण्यात आली आहे. गोजातीय पशुधनाचे बाजार भरवताना लसीकरण प्रमाणपत्र, पशुवैद्यकीय अधिकाऱ्याचा दाखल बंधनकारक कऱण्यात आला आहे. गोवर्गीय पशुधनाच्या शर्यती, जत्रा, प्रदर्शन भरवतानाही लसीकरण, पशुवैद्यकीय अधिकाऱ्याचा दाखला बंधनकारक करण्यात आला आहे.