Winter Session : शेडनेट व पशुधन नुकसानीसाठी विम्याची तरतूद करा, अंबादास दानवे यांची विधानपरिषदेत मागणी

Ambadas danve on Crop Damage : राज्यात मागील आठवड्यात झालेल्या गारपीट व अवकाळी पावसामुळे २२ जिल्ह्यांमध्ये साडे चार लाख हेक्टर क्षेत्रावर मोठ्या प्रमाणात नुकसान झाले आहे. शेतकऱ्याच्या हातातोंडाशी आंलेली पिके वाया गेली आहेत. तसेच शेतातील शेडनेट मोठ्या प्रमाणात नुकसान झाले. तसेच पशुधनाची हानी झाली आहे, त्यांना मदत करण्यासाठी कोणत्याही विम्याची तरतूद नाही. त्यामुळे शासनाने शेडनेट व पशुधन नुकसानीसाठी विम्याची तरतूद करावी, अशी मागणी विधान परिषदेचे विरोधी पक्षनेते अंबादास दानवे यांनी सभागृहात केली.

महाराष्ट्र विधीमंडळाच्या हिवाळी अधिवेशनाला आजपासून नागपूरात सुरुवात झाली. अधिवेशनाच्या पहिल्या दिवशी शेतकऱ्यांना शेतकऱ्यांना सरसकट कर्जमाफी, शेतमालाला भाव, दुष्काळग्रस्तांना मदत, अवकाळी पावसामुळे झालेल्या नुकसानीची भरपाई आदी प्रश्नांवर महाविकास आघाडीच्यावतीने आज विधिमंडळाच्या पायऱ्यांवर सरकारविरोधात जोरदार घोषणाबाजी केली.

विधीमंडळाच्या कामकाजाच्या सुरुवातीला विधान परिषदेमध्ये विरोधी पक्षनेते अंबादास दानवे यांनी अवकाळी पावसामुळे झालेल्या नुकसानीबाबत सरकारचे लक्ष वेधले. मागील काही दिवसांपासून राज्यात झालेल्या अवकाळी पावसामुळे शेती पिकांचे अतोनात नुकसान झाले आहे. राज्यात मागील आठवड्यात झालेल्या गारपीट व अवकाळी पावसामुळे २२ जिल्ह्यात साडे चार लाख हेक्टर क्षेत्राचे मोठ्या प्रमाणात नुकसान झाले. त्याचबरोबर शेडनेड उद्धवस्त झाले आहेत. त्यामुळे शेतकऱ्यांचे लाखो रुपयांचा फटका बसला आहे. शेडनेट व पशुधनासाठी कोणत्याही प्रकारची विम्याची तरतूद नाही. त्यामुळे शासनाने शेडनेट व पशुधन नुकसानीसाठी विम्याची तरतूद करावी, अशी मागणी दानवे यांनी केली.

विधानसभेत विरोधी पक्षनेते विजय वड्डेटीवार यांनी दुष्काळी परिस्थिती आणि अवकाळी पावसामुळे झालेल्या नुकसानीचे पंचनामे, भरपाई आणि अग्रीम पीक विम्याच्या प्रश्नांवर घेरण्याचा प्रयत्न केला. त्याला उत्तर देत असताना उपमुख्यमंत्री देवेंद्र फडणवीस यांनी महायुती सरकार शेतकऱ्यांच्या पाठिशी आहे. जिल्हाधिकारी आणि जिल्हा कृषी अधिकाऱ्यांना पंचनाम्याचे आदेश दिले असून नुकसानग्रस्तांना मदत देण्याची कार्यवाही सुरू झाली असल्याचे फडणवीस यांनी सांगितले.