Assembly Winter Session 2023 : सरसकट नुकसान भरपाई द्या! गळ्यात संत्र्याच्या माळा घालून महाविकास आघाडीचे विधीमंडळाच्या पायऱ्यावर आंदोलन

Nagpur Hiwali Adhiveshan : महाराष्ट्र विधीमंडळाच्या हिवाळी अधिवेशनाला नागपुरात आजपासून सुरुवात होत आहे. गारपीट व अवकाळीमुळे झालेली नुकसान, मराठा आरक्षण, ड्रग्ज कारवाई, आरोग्य विभागातील कथित घोटाळ्याच्या आरोपांमुळे नागपुरातील वातावरण तापले आहे.

अधिवेशनाच्या पहिल्या दिवशी संत्र्याच्या माळा घालून महाविकास आघाडीचे आमदार शेतकऱ्यांसाठी आक्रमक झाल्याचे पाहायला मिळाले. विरोधी पक्षनेते विजय वड्डेटीवार आणि अंबादास दानवे यांच्या नेतृत्वाखाली आज महाविकास आघाडीच्या आमदारांनी विधानभवनाच्या पायर्‍यांवर सरकारच्या विरोधात जोरदार घोषणाबाजी केली.

सरकार प्रचारात व्यस्त, अवकाळी पावसामुळे शेतकरी मात्र उध्वस्त… शेतकरीद्रोही सरकारचा निषेध असो… सोयाबीनला भाव मिळालाच पाहिजे… कापसाला भाव मिळालाच पाहिजे… संत्र्याला भाव मिळालाच पाहिजे… शेतकऱ्यांची चेष्टा करणार्‍या सरकारचा निषेध असो… अशा घोषणा देत महाविकास आघाडीच्या आमदारांनी आक्रमक भूमिका घेतली.