Humani Pest: परभणीत हुमणीचा प्रादुर्भाव

Parbhani News: परभणी जिल्ह्यातील हजारो हेक्टरवरील सोयाबीन, कपाशी, तूर, हळद आदी पिकांमध्ये हुमणीचा प्रादुर्भाव आढळून येत आहे. टाकळखोपा (जिंतूर) येथील सोयाबीनमध्ये हुमणी कीडीने आर्थिक नुकसानीची पातळी ओलांडली असून प्रादुर्भावाचा उद्रेक (आउटब्रेक) झाला आहे. यामुळे सुमारे २०० ते २५० हेक्टर सोयाबीनचे नुकसान झाले असून, शेतकऱ्यांच्या अडचणी वाढल्या आहेत.

टाकळखोपा येथे यंदाच्या खरिपात ८४० हेक्टरवर पेरणी झाली आहे. त्यात सोयाबीनचे पेरणी क्षेत्र ३६१ हेक्टर त्यापैकी २०० ते २५० हेक्टर सोयाबीन बाधित झाले आहे. अनेक शेतकऱ्यांच्या संपूर्ण सोयाबीनचे नुकसान झाले आहे.

गुरुवारी (ता. २४) परभणी येथील कृषी विज्ञान केंद्राचे पीकसंरक्षक विशेषज्ञ डॉ. अमोल काकडे, मंडल कृषी अधिकारी पी. एस. पाईकराव, उपकृषी अधिकारी पी. ए. देवकर, सहायक कृषी अधिकारी गजानन घुगे यांनी टाकाळखोपा येथे भेट देऊन शेतकऱ्यांना हुमणी कीडीच्या व्यवस्थापनाबाबत उपाययोजना सांगितल्या. परंतु त्यानंतरही हुमणीचा प्रादुर्भाव नियंत्रणात येत नसल्याचे बाधित शेतकऱ्यांनी सांगितले. हुमणी बाधित क्षेत्राचे पंचनामे करून मदत देण्याची मागणी शेतकऱ्यांनी केली आहे.