Nashik Heavy Rain: मुसळधारेने गोदावरीला पूर

Nashik News: सलग तीन दिवसांपासून जिल्ह्यातील पश्चिम भागात धरणांच्या पाणलोट क्षेत्रात मुसळधार पाऊस बरसत आहे. यामध्ये जिल्ह्यातील त्र्यंबकेश्वरमध्ये अतिवृष्टी तर इगतपुरी, पेठ, सुरगाणा, दिंडोरी, नाशिक व बागलाण या तालुक्यांत पावसाचा जोर आहे. संततधार सुरू असल्याने भाम, भावली, वालदेवी, आळंदी, भोजापूर, हरणबारी व केळझर ही धरणे तुडुंब भरली आहेत. तर इतर धरणांतून मोठा विसर्ग सुरू आहे. गोदावरी नदीकाठ परिसरात पूरस्थिती निर्माण झाली आहे.

संततधारेमुळे इगतपुरीतील धरणांमध्ये पाणीसाठ्यात कमालीची वाढ होत आहे. तर पश्चिम पट्ट्यातील दमणगंगा, गोदावरी, दारणा, वालदेवी नद्या दुथडी भरून वाहत असल्याने धरणातून विसर्ग सातत्याने वाढविला जात आहे. जिल्ह्यातील १४ धरणांतून विसर्ग सुरू आहे. पाऊस वाढल्याने त्यात टप्प्याटप्प्याने वाढ करण्यात आली आहे. तर इगतपुरी तालुक्यातील दोन धरणांतून विसर्ग काहीसा कमी करण्यात आला आहे.

सध्या गोदावरी नदीत धरणातील विसर्गाचे पाणी येत असल्याने पाणीपातळी वाढली आहे. परिणामी पुरामुळे चांदोरी, सायखेड्यात पुराचे पाणी शिरले आहे. गोदावरीच्या पुरामुळे चांदोरी सायखेडा गावात पाणी शिरल्याने खंडेराव मंदिर पाण्याखाली गेले आहे. शहरात वालदेवीच्या पुराने पाथर्डी दाढेगाव यांना जोडणाऱ्या पुलावरून पाणी वाहत असल्याने गावांचा संपर्क तुटला. जनावरे वाहून गेली. सुरगाण्यात दरड कोसळल्याने गावांचा संपर्क तुटला. दमणगंगा नदीला आलेल्या पुरामुळे सुरगाणा तालुक्यात उंबरठाण खुंटविहीर येथेही संपर्क तुटला आहे.

सुरगाणा आणि त्र्यंबकेश्वर तालुक्यांत प्रत्येकी एक याप्रमाणे दोन जण बुडाले. शहरात तसेच सुरगाण्यात काही गावांचा संपर्क तुटला. दारणा नदीचा विसर्ग १३ हजार क्युसेकपर्यंत वाढविण्यात आला आहे. नाशिक शहरातील पंचवटी येथील गोदाकाठ परिसरात पाणी आल्याने अनेक मंदिरे पाण्याखाली गेली. तर जनजीवन विस्कळित झाले आहे.

या महसूल मंडलांत अतिवृष्टी (कंसात पाऊस मिमी ता. ७)

दिंडोरी ननाशी (७०)

इगतपुरी नांदगाव (७०), टाकेद (७०)

पेठ जोडमोडी (७०.५)

त्र्यंबकेश्वर त्रंबकेश्वर (८५.५), वेळुंजे (८५.५), दहाडेवाडी (८१.८)