Napane Glass Bridge: बारमाही वाहणाऱ्या नापणे धबधब्यावर काचेचा पूल

Sindhudurg News: जिल्ह्यात बारमाही वाहणाऱ्या नापणे (ता. वैभववाडी) धबधब्यावर काचेचा पूल उभारण्यात आला आहे. पर्यटन वृद्धीकरिता सिंधुरत्न योजनेतून ९९ लाख ६३ हजार रुपयांचा निधी उपलब्ध करून देण्यात आला असून या पुलाचे ८० टक्के काम पूर्ण झाले आहे. अशा पद्धतीने उभारलेले हा राज्यातील पहिला पूल ठरणार आहे.

सभोवताली हिरवीगर्द झाडी, पक्ष्यांचा किलबिलाट, ८० ते ९० फूट उंचावरून ओसंडून वाहणारे पाणी आणि त्यातून दवबिंदूंची होणारी उधळण म्हणजे बारमाही वाहणारा नापणे धबधबा असेच वर्णन या धबधब्याचे केले जाते.

येथे एक मोठा आणि दोन लहान असे एकूण तीन धबधबे आहेत. त्यामुळे सिंधुरत्न योजनेतून मोठ्या आणि लहान धबधब्यांच्या मध्यावर पर्यटनदृष्ट्या अतिशय आकर्षक काचेचा पूल उभारण्यात आला आहे.

सिंधुरत्न योजनेतून ९९ लाख ६३ हजार रुपये खर्चून हा पूल उभारला जात आहे. या पुलाचे सुमारे ८० टक्के काम पूर्ण झाले आहे. अतिशय वेगळी संकल्पना राबवीत हे काम करण्यात आले असून, काचा बसवून तयार केलेला धबधब्यावरील हा महाराष्ट्रातील पहिला पूल ठरला आहे. या पुलाच्या बाजूला काचा बसविण्याचे काम सध्या सुरू आहे. पुढील दहा-पंधरा दिवसांत हे काम पूर्ण होऊन हा पूल पर्यटकांसाठी खुला होईल.