Girna Dam Water Storage : गिरणा धरणातील जलसाठा वाढतोय

Jalgaon News : चाळीसगावनजीकच्या गिरणा नदीवरील गिरणा धरणातील जलसाठा ६२ टक्क्यांपर्यंत पोचला आहे. त्यातून अजून विसर्ग सुरू झालेला नाही. पण धरणातील जलसाठा सतत वाढत असल्याने गिरणा पट्ट्यात आनंद आहे.

मागील वर्षी धरण ऑगस्टअखेर १०० टक्के भरले होते. त्यातून पाण्याचा विसर्ग सुरू करण्यात आला होता. मागील वेळेस गिरणा धरणाचे पाणी नदीत न सोडता नदीजोड प्रकल्पाद्वारे पारोळा तालुक्यातील भोकरबारी व म्हसवे येथील लघु प्रकल्प आणि एरंडोलातील अंजनी प्रकल्पात सोडण्यात आले होते. सहा दरवाज्यांतून हा विसर्ग सुरू होता.

यंदा धरणातील जलसाठा वाढत आहे. पण शंभरी केव्हा गाठेल,असा मुद्दा आहे. गिरणा धरणाच्या पाणलोट क्षेत्रात जोरदार पाऊस झाला आहे. यामुळे गिरणा धरणात पाण्याची आवक आणखी वाढली आहे. गिरणा धरणाची साठवणक्षमता १८ टीएमसी असून, या धरणावर जिल्ह्यातील गिरणा पट्ट्यातील पाच तालुक्यांसह अनेक गावे, शहरांचा पाणीपुरवठा अवलंबून आहे.

धरणात जसा पाण्याचा प्रवाह वाढेल, तसा प्रवाह कमी-अधिक केला जाणार आहे. गिरणा धरण जळगावसाठी महत्त्वाचे आहे. हे धरण नाशिक जिल्ह्यातील नांदगाव व जळगावच्या चाळीसगाव तालुक्याच्या सिमेवर आहे.

गिरणा नदीला प्रवाही पाणी अजून आलेले नाही. मागील वर्षी गिरणा नदी नोव्हेंबरमध्येही प्रवाही होती. कारण धरणातून विसर्ग सुरू होता. यंदा जळगाव जिल्ह्यात पाऊस कमी आहे. यामुळे अनेक प्रकल्पांतील जलसाठा वाढलेला नाही. पण गिरणा धरणाचे लाभक्षेत्र नाशिक व गुजरातमधील सापुतारा भागात आहे. या भागात पाऊस असल्याने गिरणातील जलसाठा वाढत आहे.

गिरणा धरण सध्याची स्थिती (जुलै २०२५ अखेर)

सध्याचा जलसाठा: ६२% भरलेले

एकूण साठवण क्षमता: १८ टीएमसी

धरणात पाण्याची आवक : सुरू आहे (पाणलोट क्षेत्रात जोरदार पाऊस)