Sangli Water Storage : शिराळा तालुक्यातील ४७ तलाव पूर्ण क्षमतेने भरले

Sangli News : शिराळा तालुक्यात गेल्या दीड दोन महिन्यापासून पाऊस सुरू आहे. या पावसामुळे तालुक्यातील ४९ पाझर तलावांपैकी ४७ तलाव पूर्ण क्षमतेने भरलेले असून सांडव्यातून पाणी बाहेर पडले आहे.

उर्वरित दोन पाझर तलावा पैकी करमाळे नंबर १ व पाचुंब्री या पाझर तलावाचे साठवण तलावात रूपांतर करण्याच्या दुरुस्तीचे काम सुरू आहे.त्यामुळे सद्यःस्थितीत या दोन्ही ही तलावामध्ये ५०ते ५५ टक्के इतका पाणी साठा उपलब्ध झाला आहे.

मे महिन्याच्या उत्तरार्धात आणि जून महिन्यात आणि आता जुलै महिन्यात सुरु असलेल्या पावसामुळे तालुक्यातील पाझर तलाव पूर्ण क्षमतेने भरून ओसंडून वाहत आहेत.शिराळा तालुक्यातील धरण,तलाव,विहिरी,कुपनलिका ओसंडून वाहत असल्याने बळीराजा सुखवला आहे.

तालुक्यात ४९ तलावांची एकूण पाणी साठवण क्षमता २४०.६६ दशलक्ष घनफूट असून सिंचन क्षमता १६७० हेक्टर आहे. दोन तलावाचे काम सुरु असल्याने यावर्षी १६०० हेक्टर क्षेत्राला होणार सिंचनास फायदा होणार आहे.

एकूण पाझर तलाव ४९

१०० टक्के भरलेले तलाव ४७

काम सुरु असल्याने दोन तलावात ५० ते ५५ टक्के पाणीसाठा

सध्याचा पाणी साठा २३०.१६ दशलक्ष घनफूट

सध्याची सिंचन क्षमता १६००(हेक्टर)