Crop Competition : फळे, भाजीपाला, मसाला पिके स्पर्धा २ जानेवारीला!

Nanded News : माजी पंतप्रधान डॉ. मनमोहन सिंह यांच्या निधनामुळे सात दिवसांचा राष्ट्रीय दुखवटा जाहीर केला आहे. त्यामुळे माळेगाव यात्रेदरम्यान फळे, भाजीपाला, मसाला पिके स्पर्धा आता २ जानेवारीला होणार आहे. कृषी प्रदर्शनही दोन ते चार तारखेदरम्यान होणार असल्याची माहिती कृषी विभागाने केली आहे.

माळेगाव येथे सटवाई मंदिराजवळ हे प्रदर्शन दोन ते चार जानेवारी या कालावधीत होणार आहे. माळेगाव यात्रेमध्ये सहभागी होणाऱ्या शेतकऱ्यांनी हा बदल लक्षात घ्यावा व प्रदर्शनात सहभागी होणाऱ्या पुरस्कार प्राप्त शेतकरी, स्टॉल धारक तसेच शेतातील फळे भाजीपाला व पिके स्पर्धेसाठी आणणाऱ्या स्पर्धकांनी हा बदल तातडीने लक्षात घ्यावा,असे आवाहन करण्यात आले आहे.

या प्रदर्शनातील सर्वात महत्त्वाची फळे भाजीपाला व मसाला पिके स्पर्धा २ जानेवारीला होईल. स्पर्धेत भाग घेण्यासाठी आपले फळे, भाजीपाला व मसाला पिकांचे नमुने २ जानेवारी गुरुवारी सकाळी बारा वाजेपर्यंत डॉ. शंकरराव चव्हाण कृषी प्रदर्शनात कृषी विभागाच्या स्टॉलमध्ये आणून ठेवावे, असे आवाहन करण्यात आले आहे.

या कृषी प्रदर्शनात प्रस्तावित करण्यात आलेला कृषिनिष्ठ पुरस्कार प्राप्त शेतकऱ्यांचा सत्कार कार्यक्रम देखील दोन जानेवारीला च होणार आहे. कृषिनिष्ठ पुरस्कार प्राप्त शेतकऱ्यांचा सत्कार सकाळी अकरा वाजता होईल. तसेच प्रदर्शनात सहभागी होणाऱ्या सर्व स्टॉल धारकांनी आपले बियाणे, खते, औषधी, ट्रॅक्टर, शेती उपयोगी अवजारे व इतर सर्व स्टॉल दिनांक २ जानेवारी रोजी सकाळी कृषी प्रदर्शनात उभे करण्याचे आवाहन कृषी विकास अधिकारी सचिन कपाळे यांनी केले आहे.

कृषी प्रदर्शन २ ते ४ जानेवारी दरम्यान

फळे भाजीपाला व मसाले पिके स्पर्धा तसेच कृषिनिष्ठ पुरस्कार प्राप्त शेतकऱ्यांचा सत्कार हा दोन जानेवारी रोजी होत आहे. तथापि हे कृषी प्रदर्शन दोन ते चार जानेवारी असे तीन दिवस सुरू असणार आहे तेव्हा नांदेड महानगरातील नागरिकांनी मोठ्या संख्येने शेतकऱ्यांचा उत्साह वाढविण्यासाठी माळेगाव यात्रेदरम्यान होणाऱ्या या प्रदर्शनाला भेटी द्याव्यात असे आवाहनही कृषी विकास अधिकारी सचिन कपाळे यांनी केले आहे.