Success Story : शेतकऱ्याच्या घरातून डॉक्टरपर्यंतचा यशस्वी प्रवास

Jalgaon News : जिल्हा परिषदेच्या शाळेत प्राथमिक शिक्षण घेतलेला सनपुले (ता. चोपडा, जि. जळगाव) येथील शेतकरी पुत्र गौरव संजय गुर्जर (पाटील) याने मुंबई येथील सायन वैद्यकीय महाविद्यालयातून एमबीबीएसचे शिक्षण पूर्ण केले.

गौरव हा सनपुले येथील मच्छिंद्र पाटील यांचा नातू आहे. मच्छिंद्र यांचे पुत्र संजय व किरण हे दोन्ही शेतकरी आहेत. गौरवची आई मीनाबाई यांचे माहेर कुरवेल येथील असून, त्यादेखील शेतकरी कुटुंबातील आहेत.

कुटुंबात शासकीय नोकरी किंवा वैद्यकीय, अन्य सेवांचा कुठलाही वारसा नसताना गौरव याने वैद्यकीय क्षेत्रातील एमबीबीएसची पदवी प्रथम श्रेणीत मिळविल्याने त्याचे कौतुक केले जात आहे. गौरव याने प्राथमिक शिक्षण आपल्या गावातील जिल्हा परिषदेच्या शाळेत घेतले.

पुढे चोपडा येथील कालभैरव माध्यमिक विद्यालयात त्याने शिक्षण घेतले. दहावीला तो विद्यालयात पहिल्या क्रमांकाने उत्तीर्ण झाला होता. पुढे एमबीबीएससाठी देखील त्याला गुणांच्या बळावर (मेरिट) शासकीय महाविद्यालयात शिकण्याची संधी (फ्री शीप) मिळाली.

हे नेत्रदीपक यश आई-वडील आणि काका किरण गुर्जर व काकू कविता यांच्या आशीर्वादाने मिळाले. तसेच गुरू, शिक्षक या सर्वांनी मार्गदर्शन केले, अशी प्रतिक्रिया गौरव याने दिली. किरण गुर्जर हे शेतकरी संघटनेत सक्रिय आहेत.

केळी, पपई, कापूस, तेलबिया पिकांची यशस्वी शेती गुर्जर कुटुंबीय सनपुले येथे करीत आहेत. त्याचा नुकताच गावातील विद्यालयात विधानसभेचे माजी अध्यक्ष अरुण गुजराथी व संदीप पाटील यांच्या हस्तेदेखील सत्कार करण्यात आला.