Paddy Crop Quality Issue : किडीमुळे भातपिकाचा दर्जा खालावण्याची भीती

Mahad News : काही दिवसांपासून महाड तालुक्यामध्ये पावसाने दडी मारली असून मोठ्या प्रमाणात ऊन पडत असल्याने भातशेती संकटात सापडली. महाडमधील भात शेतीवर खोडकिड्याचा प्रादुर्भाव झाला असल्याचे कृषी विभागाने केलेल्या कीड रोग सर्वेक्षणाअंतर्गत दिसून आले. शेतकऱ्यांनी या खोडकिडीचा बंदोबस्त करण्यासाठी उपाययोजना करावी, असे आवाहन कृषी विभागाने केले आहे.

एका बाजूला महाड तालुक्यात भात शेतीचे क्षेत्र घटत असतानाच दुसरीकडे मात्र लहरी हवामानाचा फटकादेखील भात पिकाला बसत आहेत. काही दिवसांपासून पावसाने दडी मारली आहे तर काही वेळा तुरळत पाऊस पडत आहे. परंतु ऊन पडू लागल्याने शेतातील पाण्याचे प्रमाणही कमी होऊ लागले आहे. भात पीक धोक्यात येऊ शकते खबरदारीचा उपाय म्हणून कृषी विभागाकडून कीडरोग सर्वेक्षणअंतर्गत महाडमध्ये सर्वेक्षण करण्यात आले आहे.

कृषी विभागाने सुचविलेले उपाय

किडीच्या व्यवस्थापनाकरिता क्विनॉलफॉस २ मिली प्रती लिटर पाण्यातून फवारणी करावी किंवा फिप्रोनील ०.३% दाणेदार कीटकनाशक २०८ ग्रॅम प्रतिगुंठा या प्रमाणात जमिनीमध्ये पुरेसा ओलावा असताना वाळूमध्ये किंवा युरिया खतामध्ये मिश्रण करून भात शेतीमध्ये वापरावे. असे आवाहन जीवन आरेकर यांनी तालुक्यातील शेतकऱ्यांना केले.

खोडकिड म्हणजे काय?

भात पीक कापणीनंतर हा किडा कोष अवस्थेत राहतो. दुसऱ्या वर्षाच्या पेरणीनंतर पोषक वातावरण मिळाल्यानंतर यामधून पतंग बाहेर पडून साधारणतः तो किडा दीडशे ते दोनशे अंडी घालतो.

अळ्या तयार झाल्यानंतर भाताच्या खोडात जाऊन कोंब खाण्यास सुरवात करतात.

भात वाढीच्या अवस्थेत प्रादुर्भाव झाल्यास भाताचे मधले पाते पिवळे, लालसर होऊन त्यांची सुरळी होते. याचा भात पिकावर परिणाम होतो.