Paddy Crop Issue : संगमेश्वरला भातशेतीत निळे भुंगेरे, करप्याचा प्रादुर्भाव

Ratnagiri News : श्रावण सुरू झाल्यानंतर पावसाने उघडीप घेतल्यामुळे संगमेश्वर तालुक्यात दोन हेक्टर क्षेत्रावरील भातशेतीत निळे भुंगेरे व करप्याचा प्रादुर्भाव झालेला आहे. तर राजापूर तालुक्यातही काही गावांमध्ये हे चित्र आहे. त्यामुळे शेतकऱ्याची चिंता वाढली असून पावसाने अशीच दडी मारल्यास किडरोग वेगाने वाढण्याची भीती व्यक्त केली. जिल्ह्यात सर्वत्रच पावसाने विश्रांती घेतल्यामुळे कमी-अधिक प्रमाणात निळे भुंगेरे आणि करपा दिसत आहे.

जुलै महिन्यात पावसाने जोर केल्यामुळे भात पुनर्लागवडीत कोणतीच अडचण आलेली नाही. मात्र ऑगस्ट महिन्यात पावसाने उघडीप घेतली. सोमवारी (ता. १२) सकाळी ८.३० वाजेपर्यंतच्या २४ तासांत सरासरी ४ मिमी पाऊस झाला आहे. तसेच १ जूनपासून आतापर्यंत सरासरी २७९१.६८ मिमी पाऊस झाला असून, तुलनेत ७७ टक्क्यांहून अधिक पाऊस पडला. त्यामुळे भातशेती तरारली आहे;

मात्र ऑगस्टच्या पहिल्या पंधरवड्यात पावसाने उघडीप दिली. गेले चार दिवस कडकडीत ऊन पडल्यामुळे संगमेश्वर, राजापूर तालुक्यांत भात शेतीवर करपा रोगासह निळा भुंगेरा किडीचा प्रादुर्भाव झाला आहे. त्यामुळे शेतकऱ्यांच्या आनंदावर विरजण पडले आहे. संगमेश्वर तालुक्यात धामणी, गोळवली, राजवाडी, वाशीतर्फे संगमेश्वर, कुळ्ये या गावात शेतीवर करपा आढळलेला आहे. काही शेतांमध्ये भाताची रोपे किडींनी फस्त केली आहेत.

काही ठिकाणी रोपे उन्हामुळे पिवळी पडली आहेत. पावसाची स्थिती अशीच राहिली तर भात उत्पादनावर परिणाम होऊ शकतो. किडींचा प्रादुर्भाव झाल्यानंतर कृषी विभागाकडून तातडीने शेतकऱ्यांच्या शेतावर जाऊन पाहणी केली आहे. निळ्या भुंगेऱ्यांचा अधिक प्रादुर्भाव आहे. तर करपा किरकोळ ठिकाणी आहे. त्यावर अधिकाऱ्यांनी उपाययोजना सुचवलेल्या आहेत. दरम्यान, यंदा जिल्ह्यात ६७ हजार हेक्टरवर भात लागवड झालेली आहे. समाधानकारक पावसामुळे रोपे वाढीला जोर मिळाला आहे.