Farmer Issue: नियतीनेच तोडला थुट्टे कुटुंबाचा ‘भरवसा’

Buldana News: बुलडाणा जिल्ह्यातील गणेश श्रीराम थुट्टे व त्यांची पत्नी रंजना थुट्टे यांनी दोन दिवसांपूर्वी केलेल्या आत्महत्येमुळे संपूर्ण महाराष्ट्रात हळहळ व्यक्त होत आहे. या शेतकरी कुटुंबाच्या डोक्यावर बँकेचे दोन लाखांवर कर्ज होते. त्यातच यंदा हुमणी अळीच्या उच्छादामुळे दुबार पेरणीची स्थिती निर्माण झाली होती.

या आर्थिक विवंचनेतच चिखली तालुक्यातील भरोसा गावच्या या दांपत्याने गुरुवारी (ता.२४) सायंकाळी सामूहिक आत्महत्येसारखे टोकाचे पाऊल उचलले. त्यांच्यामागे विवाहित दोन मुली, मुलगा, सून, नात असा परिवार आहे.

बुलडाणा जिल्ह्यातील भरोसा गावातील थुट्टे परिवाराकडे पाच एकर कोरडवाहू शेती आहे. यावरच कुटुंबाचा उदरनिर्वाह भागवला जातो. यंदा त्यांनी सोयाबीनची पेरणी केली. पीकही चांगले उगवलेही. मात्र हुमणी अळीच्या उच्छादामुळे हे पीक हातातून गेले. दुबार पेरणीचे संकट ओढवले होते.

या शेतकऱ्यावर आधीच सेंट्रल बँक व बँक ऑफ महाराष्ट्र अशा दोन बँकांचे सुमारे दोन लाखांवर कर्ज थकलेले आहे. अशा अवस्थेत दुबार पेरणीसाठी पैसा कसा व कोठून उभा करावा, याची चिंता त्यांना भेडसावत होती. त्यातूनच त्यांनी हे टोकाचे पाऊल उचलल्याचे गावकरी सांगत आहेत. या घटनेने केवळ त्यांच्या कुटुंबाला नव्हे, तर अख्ख्या जिल्ह्याला हादरून टाकले आहे.

या दांपत्याला दोन मुली आशा आणि नीता, तर मुलगा गणेश अशी अपत्ये आहेत. तिघांचीही लग्न झालेली आहेत. नागेश व पत्नी शीतल यांना तीन वर्षांची मुलगी ज्ञानेश्‍वरी आहे.

शरद जोशींच्या विचारांचे गाव

चिखली तालुक्यातील भरोसा हे गाव शेतकरी संघटनेचे नेते शरद जोशी यांच्या विचारांचे पाईक गाव मानले जाते. शेतकरी आंदोलनांना या गावातून पाठिंबा मिळत आलेला आहे. त्याच गावात हे घडणे दुर्दैवी मानले जात आहे.

आमदारांकडून सांत्वन

घटनेनंतर सिंदखेडराजा मतदार संघाचे आमदार मनोज कायंदे यांनी थुट्टे कुटुंबाची भेट घेत सदस्यांचे सांत्वन केले. सर्वतोपरी मदत करण्याचे आश्‍वासनही त्यांनी या वेळी दिले. याप्रसंगी चिखलीचे तहसीलदार संतोष काकडे, सहायक गटविकास अधिकारी गजानन पोफळे, अंढेरा ठाणेदार रूपेश शक्करगे, नितीन कायंदे, सरपंच गजानन थुट्टे, विनोद थुट्टे, तलाठी वैशाली मगर यांच्यासह विविध विभागांचे अधिकारी, कर्मचारी उपस्थित होते.