Marathwada Farmer Issue: मराठवाड्यात ५४३ शेतकऱ्यांच्या आत्महत्या

Chhatrapati Sambhajinagar News: यंदा जानेवारी ते ११ जुलै २०२५ या कालावधीत मराठवाड्यातील आठही जिल्ह्यांत सुमारे ५४३ शेतकऱ्यांनी आत्महत्या केल्याची माहिती पुढे आली आहे. या आत्महत्यांपैकी ३३९ शेतकऱ्यांच्या आत्महत्या शासनाच्या मदतीसाठी पात्र ठरल्या ३१७ प्रकरणात प्रत्यक्ष मदत देण्यात आली तर सुमारे ६६ प्रकरणे अपात्र ठरली. याशिवाय १३८ शेतकरी आत्महत्यांची प्रकरणे चौकशी व निर्णयाकरिता प्रलंबित असल्याची माहिती आहे.

नैसर्गिक आपत्तीमुळे शेतीवरील संकट कमी होण्याची नाव घेत नाहीत. त्यामुळे शेतीवरील संकटामुळे येणारी आर्थिक विवंचना व त्यातून निर्माण होणारे प्रश्‍न यामुळे अनेक शेतकरी टोकाचा निर्णय घेत मृत्यूला जवळ करतात. यंदा आजवरच्या शेतकरी आत्महत्यांच्या प्रकरणात बीड जिल्ह्यात सर्वाधिक शेतकरी आत्महत्या झाल्याचे पुढे आले आहे. प्रशासकीय सूत्रांच्या माहितीनुसार, मराठवाड्यातील छत्रपती संभाजीनगर जिल्ह्यात जानेवारी ते ११ जुलै २०२५ या कालावधीत सुमारे ९६ शेतकरी आत्महत्यांची प्रकरणे समोर आली.

त्यापैकी ६० प्रकरणे मदतीसाठी पात्र ठरली तर ११ अपात्र ठरली आहेत. सुमारे २५ प्रकरणे चौकशी व निर्णयाकरिता प्रलंबित आहेत. जालना जिल्ह्यात ३४ शेतकऱ्यांनी मृत्यूला जवळ केले. त्यापैकी १८ शेतकरी आत्महत्यांची प्रकरणे मदतीसाठी पात्र तर १६ प्रकरणे चौकशी व निर्णयाकरिता प्रलंबित आहेत. परभणी जिल्ह्यात ६५ शेतकऱ्यांनी मृत्यूला कवटाळले. त्यापैकी २९ प्रकरणे मदतीसाठी पात्र तर १८ अपात्र ठरली.

शिवाय १८ प्रकरणे चौकशी व निर्णयाकरिता प्रलंबित आहेत. नांदेड जिल्ह्यात ७६ शेतकऱ्यांनी आत्महत्या केली. त्यापैकी ५३ प्रकरणे मदतीसाठी पात्र तर तीन अपात्र ठरली. २० प्रकरणे चौकशी व निर्णयाकरिता प्रलंबित आहेत. बीड जिल्ह्यात सर्वाधिक १३६ शेतकऱ्यांनी आत्महत्या केल्या. त्यापैकी ९३ प्रकरणे शासनाच्या मदतीसाठी पात्र तर १९ अपात्र ठरली. २४ आत्महत्यांची प्रकरणे चौकशी व निर्णयाकरिता प्रलंबित आहेत.

लातूर जिल्ह्यात ३९ शेतकऱ्यांनी आत्महत्या केल्या. त्यापैकी २६ प्रकरणे मदतीसाठी पात्र ठरली, तर १३ प्रकरणे चौकशी व निर्णयाकरिता प्रलंबित आहेत. धाराशिव जिल्ह्यात सुमारे ६६ शेतकऱ्यांनी आत्महत्या केल्या त्यापैकी ४४ प्रकरणे मदतीसाठी पात्र तर ९ प्रकरणे अपात्र ठरली. १३ प्रकरणांत चौकशी व निर्णय प्रलंबित आहे. वाढत्या शेतकरी आत्महत्या लक्षात घेता शेतीचे, शेतकऱ्यांचे प्रश्‍न निकाली काढण्यासाठी शासन स्तरावरील उपाय योजना आता तरी गतिमानतेने राबविल्या जातील का, असा प्रश्‍न उपस्थित होतो आहे.

३१७ प्रकरणात मदत

प्रशासकीय सूत्रांच्या माहितीनुसार मराठवाड्यातील आठही जिल्ह्यांत आतापर्यंत मदतीसाठी पात्र ठरलेल्या ३३९ पेकी ३१७ शेतकरी आत्महत्यांच्या प्रकरणात प्रत्येकी एक लाख रुपयांप्रमाणे शासनाने मदत दिली आहे. त्यामध्ये छत्रपती संभाजीनगर जिल्ह्यातील ६०, जालन्यातील १२, परभणीतील २९, हिंगोलीतील १६, नांदेडमधील ४०, बीडमधील ९३, लातूरमधील २३, धाराशिवमधील ४४ प्रकरणांचा समावेश आहे. सुमारे ३ कोटी १७ लाख रुपयांची मदत आतापर्यंत देण्यात आल्याची माहिती प्रशासनाच्या सूत्रांनी दिली.

महिनानिहाय शेतकरी आत्महत्या प्रकरणे

(पात्र-अपात्र)

महिना पात्र अपात्र

जानेवारी ८८ ६८

फेब्रुवारी ७५ ६१

मार्च ११० ८८

एप्रिल ८९ ६६

मे ७८ ४२

जून ८० १४

११ जुलै २३ ०