Farmer ID : शेतकऱ्यांना मिळणार स्वत:चा ओळख क्रमांक

Nanded News : भारत सरकारची ‘ग्रीस्टॅक’ संकल्पना राज्यात राबविण्याचा निर्णय शासनाने घेतला आहे. या संकल्पनेनुसार शेतकऱ्यासाठी तीन पायाभूत माहिती संच तयार करण्यात येणार आहेत. यासाठी शेतकऱ्यांना स्वत:चा ओळख क्रमांक मिळणार आहे.

सद्यःस्थितीत भारत सरकारच्या मदतीने महाराष्ट्र राज्याचा शेतकरी माहिती संच तयार करण्यासाठी स्वयं नोंदणी संकेतस्थळ तयार करण्यात आले आहे. या संकेतस्थळाद्वारे शेतकऱ्यांना स्वत:चा शेतकरी ओळख क्रमांक निर्माण करता येईल व शेतकरी माहिती संचात समाविष्ट करता येणार आहे.

शेतकरी माहिती संच तयार करण्यासाठी www.mhfr.agristack.gov.in या संकेतस्थळाचा वापर करता येणार आहे. या संकेतस्थळावर कशा प्रकारे माहिती सादर करावयाची याबाबतचे सादरीकरण १६ डिसेंबरपासून राबविण्यात येणाऱ्या मोहिमेत दिले जाणार आहे.

त्यानुसार या संकेतस्थळाचा वापर करून शेतकऱ्यांना स्वत:चा शेतकरी ओळख क्रमांक करता येणार आहे. तसेच शेतकरी ओळख निर्माण करण्याची कार्यवाही मोठ्या प्रमाणात होण्यासाठी सर्व संबंधित यंत्रणांनी प्रचार व प्रसार करावा, असे निर्देश जिल्हा प्रशासनाने दिले आहेत.

शेतकऱ्यांचा व त्यांच्या शेताची आधार संलग्न माहिती संच, हंगामी पिकांचा माहिती संच, भूसंदर्भिकृत भूभाग असणारे गाव नकाशे यांचा माहिती संच या बाबींचा समावेश यामध्ये असणार आहे.