Farmer Loan Waiver : व्याजमाफी करून मुदलाचे हप्ते करून द्या

Nashik News : शेतकरी कर्जाच्या विळख्यात अडकले असल्याने कर्जमाफी होईपर्यंत तरी व्याज माफ होणे गरजेचे आहे. तसेच, मुद्दल हप्त्यांमध्ये दिल्यास शेतकऱ्यांना पुन्हा उभे राहण्यासाठी आधार मिळेल.

या हेतूने शेतकरी संघटनेच्या पदाधिकाऱ्यांनी मंत्रालयात धडक दिली. यावेळी शेतकऱ्यांच्या कर्जावरील व्याजमाफी करून मुद्दलाचे हप्ते करून द्या या मागणीसाठी शेतकरी संघटनेकडून आक्रमक पवित्रा घेण्यात आला.

शेतकऱ्यांचे कर्जमाफी व मुद्दल व्याजमाफीच्या पार्श्वभूमीवर शरद जोशीप्रणीत शेतकरी संघटनेच्या शिष्टमंडळाने मंत्रालयात जाऊन उपमुख्यमंत्री अजित पवार, अन्न व औषध प्रशासनमंत्री नरहरी झिरवाळ यांच्याशी प्रत्यक्ष भेट घेऊन निवेदन सादर केले.

यावेळी शेतकरी संघटनेचे ज्येष्ठ नेते रामचंद्र बापू पाटील, शेतकरी संघटनेचे अध्यक्ष ललित बहाळे, शेतकरी संघटनेचे नाशिक जिल्हाध्यक्ष अर्जुन बोराडे, शेतकरी नेते प्रकाश शिंदे, एकनाथराव धनवटे, भाऊसाहेब भंडारे, रामकिसन बोंबले आदी उपस्थित होते.

दुष्काळ, अतिवृष्टी अवकळी पाऊस व शेतीमालाला वाजवी भाव न मिळाल्यामुळे शेती धंदा तोट्यात चालला आहे. त्यामुळे शेतकरी कर्ज भरू शकले नाही व ते थकबाकीदार झाले आहे. शेतकरी कर्जाच्या बोजाखाली दबला असून, व्याजाच्या ओझ्यामुळे आत्महत्येच्या उंबरठ्यावर पोहोचला आहे. म्हणूनच शेतकरी आता आवाज उठवत आहे. सरकारकडून वारंवार कर्जमाफीची आश्वासने मिळतात, मात्र प्रत्यक्षात शेतकऱ्यांना दिलासा मिळत नाही.

नाशिक जिल्हा सहकारी बँकेकडून होत असलेली कडक वसुली थांबवून शेतकऱ्यांना श्वास घेता यावा, यासाठी ही मागणी अत्यंत महत्त्वाची आहे,असे निवेदनात नमूद केले आहे. संबंधित चर्चेवेळी दोन्ही मंत्र्यांनी सकारात्मक प्रतिसाद दिला. विशेषतः मंत्री झिरवाळ यांनी, या विषयाचा पाठपुरावा मी स्वतः मंत्रालय पातळीवर करेन असे आश्वासन शिष्टमंडळाला दिले.

ही आहे प्रमुख मागणी

जिल्हा बँकेच्या कर्जदार शेतकऱ्यांचे संपूर्ण व्याज माफ करून मुद्दलाचे हप्ते करून देण्यात यावे, अशी प्रमुख मागणी केली. तसेच मयत कर्जदारांचे कर्जावरील व्याज माफीचा जो निर्णय झालेला आहे. त्याचा शासन निर्णय लवकरात लवकर काढून शेतकऱ्यांना दिलासा द्यावा व ज्या शेतकऱ्यांच्या सातबारावर बँकेचे नाव लागलेले आहेत त्या नोंदी त्वरित रद्द करण्याची प्रमुख मागणी यावेळी होती.