Farmer Loan Waiver: कर्जमाफी, रखडलेला पीकविमा, हुमणी नुकसान भरपाईसाठी मागणी

Buldhana News: तालुक्यातील शेकडो शेतकऱ्यांनी सोमवारी (ता. २८) एकत्र येत अक्षय पाटील यांच्या नेतृत्वात तहसील कार्यालयासमोर आंदोलन करीत विविध मागण्यांचे निवेदन शासनाकडे पाठवले. 

सरकारने शेतकऱ्यांना सरसकट कर्जमाफी करून शेतकऱ्यांचा सातबारा कोरा करावा, २०२३-२४ चा उर्वरित पीकविमा मिळावा या प्रमुख मागण्यांसाठी आजवर शेतकऱ्यांनी रस्त्यावर उतरून आंदोलने केली. मात्र अजूनही हजारो शेतकरी पीकविमा मिळण्यापासून वंचित आहेत.

त्या वंचित असलेल्या शेतकऱ्यांना पीकविमा वितरित करावा. मागील वर्षी २०२४ ला संपूर्ण जिल्हाभरात अतिवृष्टी झाली होती. या अतिवृष्टीमुळे अनेक शेतकऱ्यांची पिके खराब झाल्याने शासनाने मदत सुद्धा जाहीर केली.

मात्र, अजूनही काही शेतकऱ्यांना शासनाच्या उदासीन धोरणामुळे अतिवृष्टीची मदत मिळाली नाही. मदत तत्काळ जमा करावी,  तसेच यावर्षी हुमणी अळीने हजारो हेक्टर जमिनीवरचे पिके उद्धवस्त केल्याने शेतकरी संकटात सापडला आहे.

ही बाब शासनाने लक्षात घेऊन पंचनाने करावेत व शेतकऱ्यांना भरीव आर्थिक मदत करावी, यासह इतर मागण्या करण्यात आल्या.  अक्षय पाटील यांच्या नेतृत्वात तहसीलदार पवन पाटील साहेब यांना निवेदन देण्यात आले.  

याप्रसंगी तालुक्यातील शिवदास खिरोडकार,अनिलसिंह राजपूत, सदाशिव गवई, समाधान गवई, भाऊजी पाटील, वैभव जाणे, अजय गिरी, आकाश आटोळे, सोपान पाटील यांच्यासह  शेतकरी उपस्थित होते.