Farmer Demand MSP: केंद्र सरकारसोबतच्या चर्चेत शेतकरी नेते डल्लेवाल सहभाग टाळण्याची शक्यता

Government Discussions: शेतकरी नेते जगजितसिंग डल्लेवाल यांच्या आमरण उपोषणाचा ६४ दिवस आहे. केंद्र सरकारने त्यांना चर्चेसाठी १४ फेब्रुवारीचं आमंत्रण दिलं आहे. परंतु प्रकृतीचं कारण देत चंदीगडमधील बैठकीत हजर होण्यास नकार दिला आहे. मात्र ऑनलाईन पद्धतीने डल्लेवाल बैठकीला हजेरी लावू शकतात. जोवर मागण्या मान्य होत नाही, तोवर उपोषण सुरू ठेवण्याचा इशारा डल्लेवाल यांनी दिली आहे.

जगजितसिंग डल्लेवाल यांनी मंगळवारी (ता.२८) माध्यमांशी संवाद साधला. यावेळी त्यांनी पंजाबच्या शेतकऱ्यांना १२ फेब्रुवारी रोजी रही येथे आयोजित महापंचायतीत सामील होण्याचं आवाहन केलं. डल्लेवाल म्हणाले, "माझी प्रकृती पूर्णत: चांगली नाही. त्यामुळे १४ फेब्रुवारीच्या बैठकीत मी सामील होऊ शकत नाही. परंतु १२ फेब्रुवारी रोजी महापंचायत आयोजित केलेली आहे. त्या महापंचायतीमध्ये शेतकऱ्यांशी चर्चा करून १४ फेब्रुवारी रोजी बैठकीला जायचं की नाही, याबद्दलचा निर्णय घेईल." असंही डल्लेवाल म्हणाले.

संयुक्त किसान मोर्चा राजकीयला जगजितसिंग डल्लेवाल यांनी एकत्र येण्याचा प्रस्ताव दिला आहे. तसेच कोणत्याही शेतकरी संघटनेशी आमचं शत्रुत्व नाही. केवळ मत आणि मागण्यांमध्ये फरक आहे, असंही डल्लेवाल यांनी स्पष्ट केलं.

संयुक्त किसान मोर्चाच्या नेत्यांना पंजाबमधील मोगा येथील शेतकरी महापंचायतीमध्ये एकत्र येण्याचा प्रस्ताव पारित केल्याचं डल्लेवाल यांनी सांगितलं. परंतु संयुक्त किसान मोर्चा आणि संयुक्त किसान मोर्चा अराजकीयमधील मतभेदामुळे खनौरीच्या निदर्शनात डल्लेवाल सहभाग टाळण्याची शक्यता आहे.

दरम्यान, संयुक्त किसान मोर्चा अराजकीय आणि किसान मजूर मोर्चाने १४ फेब्रुवारीच्या चर्चेआधी तिसऱ्या फेरीतील बैठकीचा आग्रह धरला आहे. ही बैठक पंजाब-हरियाणाच्या सीमेवर बोलवण्यात आली आहे. १३ आणि १८ जानेवारी रोजी दोन बैठका झाल्या होत्या. परंतु तयामध्ये कोणताही तोडगा निघाला नाही.