Farm Pond: आळंदी म्हातोबा ग्रामस्थांचे लोकवर्गणीतून शेततळे

Pune News: आळंदी म्हातोबा (ता. हवेली) येथील ग्रामस्थांनी एकत्रित येऊन गावपातळीवर मदत स्वरूपात लोकवर्गणी जमा करून सुमारे दीड एकराचे शेततळे उभे केले आहे. या शेततळ्याची पाणी साठवण्याची क्षमता दोन कोटी लिटर असून पाइपलाइनसह अंदाजे तीस ते पस्तीस लाखांपर्यंत खर्च जाण्याची शक्यता आहे. या शेततळ्यातील पाण्याच्या साठ्यावर उर्वरित जमिनीचा देखील पाण्याचा प्रश्न सुटलेला आहे.

या शेततळ्यात नवीन कालव्यातून पाणी सोडण्यात आलेले आहे. त्याचे जलपूजन नुकतेच डॉ. अभिजित दरक, डॉ. राहुल काळभोर, हभप चेतन महाराज माथेफोड, राष्ट्रवादी हवेली अध्यक्ष दिलीप वाल्हेकर, केशव तिखे, सचिन माथेफोड, राजेंद्र काळभोर, नितीन करडे, सुनील तुपे, सुनील भोसले, प्रवीण राजगुरू आळंदी म्हातोबा ग्रामपंचायत प्रशासन, वि. वि.सोसायटी सदस्य व ग्रामस्थांच्या हस्ते करण्यात आले.

ग्रामदैवत श्री म्हातोबा जोगेश्वरी या देवस्थानाच्या नावावर असणाऱ्या जमिनीची देखभाल करण्यासाठी खूप वर्षांपूर्वी गावामार्फत समिती नेमण्यात आली होती; परंतु दरम्यानच्या काळात सर्व विश्वस्त मयत झाल्याने जमिनीची देखभाल कोण करणार याबाबत प्रश्नचिन्ह निर्माण झाले होते. त्यावेळी ग्रामसभा घेऊन गावच्या माध्यमातून ग्रामस्थांमधून दत्तात्रय जवळकर यांच्या अध्यक्षतेखाली एक कृती समिती न्यायालयीन कामकाजासाठी व मालमत्ता देखभालीसाठी नेमण्यात आली.

त्यानुसार या देवस्थानच्या एकूण जागेपैकी बावीस एकर शेतजमीन ओलिताखाली आणून त्या जागेचे उत्पन्न गावाला लावून द्यायचा निर्णय समस्त ग्रामस्थांनी ग्रामसभेत घेतला होता. या पार्श्वभूमीवर लोकवर्गणीमधून सदरील शेततळे बांधण्यात आलेले आहे.