Agriculture Doctor : अहिल्यानगरला ‘कृषी’ची ‘शेतीचा डाॅक्टर’ संकल्पना

Ahilynagar News : शेतकऱ्यांच्या पिकांबाबत समस्या समजून घेत त्यावर उपाययोजना, विविध शिफारसी देण्यासाठी जिल्हा अधीक्षक कृषी अधिकारी सुधाकर बोराळे यांच्या संकल्पनेतून ‘शेतीचा डाॅक्टर’ उपक्रम सुरू केला आहे.

कृषी विभागाने डाॅक्टरांप्रमाणेच प्रिस्क्रिप्शन छापल्या असून त्यावर कृषी सहायक, कृषी पर्यवेक्षक व मंडल कृषी अधिकारी यांच्याकडून समस्या समजून त्यावर उपायांबाबत सल्ले, शिफारसी लिहून दिल्या जात आहेत. राज्यात पहिल्यांदाच अहिल्यानगरला सुरू झालेल्या या उपक्रमाला शेतकरी प्रतिसाद देत आहे.

खरीप, रब्बी व उन्हाळी हंगामात वेगवेगळी पिके घेतली जातात. अशा वेळी वेगवेगळ्या पिकांवर रोगांचा प्रादर्भाव होतो. त्या वेळी त्यावर मात कशी करायची, रोगांचा प्रादुर्भाव कसा रोखायचा याबाबत शेतकऱ्यांना पुरेसी माहिती मिळत नाही.

त्यामुळे शेतकरी निविष्ठा, खते, कीटकनाशके विक्रेत्यांकडे जाऊन त्यांच्या सल्ल्याने खते, कीटकनाशके खरेदी करतात. जास्तीची अनावश्यक कीटकनाशके, खते व अन्य बाबी शेतकऱ्यांच्या माथी मारल्या जात असल्याचा आणि त्यातून बोगस खते, फवारणी औषधी विक्रीतून नुकसान झाल्याचे अनेक अनुभव आहेत.

यातून शेतकऱ्यांचे आर्थिक नुकसान होत आहे. त्यामुळे शेतकऱ्यांकडे थेट बांधावर जाऊन पिकांवरील रोग व अन्य अडचणी समजून घेत त्यावर उपाययोजना करण्यासाठी बोराळे यांच्या पुढाकाराने ‘शेतीचा डाॅक्टर’ हा उपक्रम सुरू केला आहे.