Congress Protest: मतचोरीवरून काँग्रेसचे आंदोलन

Mumbai News: केंद्रीय निवडणूक आयोगाच्या मदतीने भाजपने मतचोरी केल्याचा आरोप लोकसभेतील विरोधी पक्षनेते राहुल गांधी यांनी केल्यानंतर महाराष्ट्र काँग्रेसने शुक्रवारी (ता. ७) दादर येथे चक्का जाम आंदोलन करत निदर्शने केली. या वेळी निवडणूक आयोग व भाजप सरकार विरोधात जोरदार घोषणाबाजी करण्यात आली. तासभर चक्का जाम करण्यात आला.

या आंदोलनात प्रदेश काँग्रेसचे वरिष्ठ उपाध्यक्ष मोहन जोशी, राजन भोसले, किशोर कन्हेरे, वरिष्ठ प्रवक्ते अतुल लोंढे, अनंत गाडगीळ यांच्यासह आंदोलनात शेकडो कार्यकर्ते व पदाधिकाऱ्यांनी भाग घेतला.

या वेळी पत्रकारांशी बोलताना प्रदेशाध्यक्ष हर्षवर्धन सपकाळ म्हणाले, ‘‘राहुल गांधी यांनी अत्यंत तर्कसंगत मांडणी करून मतदानातील मोठा घोटाळा उघड केला, लोकशाहीचा गळा घोटण्याचे काम कसे सुरू आहे, हे दाखवून दिले. निवडणुकीतील हा घोटाळा स्पष्ट दिसत असल्याने सरकारने राजधर्म पाळत एखादी एसआयटी स्थापन करायला हवी होती अथवा सर्वोच्च न्यायालयाच्या न्यायमूर्तींकडून या संपूर्ण प्रकरणाची चौकशी केली पाहिजे होती.

पण राहुल गांधी यांनी पुरावे देत तथ्य मांडूनही ना केंद्र सरकारने चौकशी करण्याची धमक दाखवली ना निवडणूक आयोगाने काही खुलासा केला, उलट राहुल गांधी यांनाच प्रतिज्ञापत्र सादर करण्यास सांगितले, हा आणखी हास्यास्पद प्रकार आहे.’’

श्री. सपकाळ म्हणाले, की निवडणूक आयोगाच्या १९६० च्या नियमावलीनुसार, जर अशा प्रकारे कोणी हरकत घेतली वा आक्षेप नोंदवला तर नियम १७/१८/१९ नुसार ताबडतोब चौकशी करावी, असे कायदाच सांगत आहे, मग चौकशी का केली जात नाही, असा सवालही त्यांनी केला.

देवेंद्र फडणवीस ‘चिप मिनिस्टर’

निवडणूक आयोगाची पोलखोल केल्यानंतर भाजप हे राहुल गांधी यांच्यावर अत्यंत खालच्या स्तरावर जाऊन टीका करत असल्याचा आरोप त्यांनी केला. मुख्यमंत्री देवेंद्र फडणवीस यांनी राहुल गांधी यांच्याबद्दल जी भाषा वापरली त्यातून ते निवडणूक आयोगाचे दलाल आहेत, वकील आहेत की प्रवक्ते असा प्रश्‍न पडतो. फडणवीस यांच्यात अहंकार दडलेला आहे. या अहंकाराचा दर्प नाही तर दुर्गंधी त्यांच्या बोलण्यातून दिसली. हे ‘चीफ मिनिस्टर’ नाही तर ‘चिप मिनिस्टर’ आहेत. जेव्हा जेव्हा निवडणूक आयोगावर बोलले जाते तेव्हा तेव्हा भाजप व देवेंद्र फडणवीस यांची तडफड का होते, असा सवाल सपकाळ यांनी केला.