Agriculture Univesity Scam: संशोधन संचालकांच्या जन्म तारीख शोधासाठी समिती

Pune News: महाराष्ट्र कृषी शिक्षण व संशोधन परिषदेचे माजी संचालक व महात्मा फुले कृषी विद्यापीठाचे विद्यमान संशोधन संचालक डॉ. विठ्ठल साहेबराव शिर्के यांच्या जन्मतारखेची कागदपत्रे बनावट असल्याची तक्रार दाखल झाल्यामुळे चारही विद्यापीठांमध्ये खळबळ माजली आहे. या प्रकरणी चौकशी समिती नियुक्त करण्यात आली आहे.

कृषी परिषदेच्या सूत्रांनी सांगितले, की डॉ. शिर्के यांनी स्वतःचे नाव, आडनाव आणि जन्म तारीखदेखील बदलली आहे. मात्र हा बदल वैध की अवैध याविषयी कमालीचा संभ्रम आहे. शिर्के यांची सेवाविषयक कागदपत्रे राहुरी विद्यापीठात आहेत. त्यामुळे विद्यापीठातील विस्तार शिक्षण विभागप्रमुखाच्या अध्यक्षतेखाली पाच जणांची चौकशी समिती नियुक्त केली आहे. त्यात कृषी परिषदेच्या सहसंचालकाचाही समावेश आहे. या समितीने एक महिन्याच्या आत अहवाल देण्याचे आदेश विद्यापीठाने दिले होते. मात्र समितीने अहवाल दिलेला नसल्याने या प्रकरणी कोणतीही कारवाई करता आलेली नाही.

श्री. शिर्के हे कनिष्ठ संशोधन सहायक म्हणून पुणे कृषी महाविद्यालयात रुजू झाले होते. त्यानंतर त्यांची प्राध्यापक, विभाग प्रमुख, सहयोगी अधिष्ठाता, कुलसचिव आणि त्यानंतर थेट संशोधन संचालकपदी नियुक्ती केली गेली. शास्त्रज्ञांच्या म्हणण्यानुसार, श्री. शिर्के यांचा हा प्रवास चालू असतानाच इतर ज्येष्ठ प्राध्यापकांवर अन्याय केला जात होता. तसेच, जन्मतारखेच्या खोट्या नोंदीच्या आधारे ते निवृत्तीनंतर देखील पदे दिली गेली.

तशा लेखी तक्रारी केल्या होत्या. तसेच खोट्या कागदपत्रांबाबत पोलिसांकडेही तक्रारी गेल्या. तेव्हाही पोलिसांनी विद्यापीठाशी पत्रव्यवहार केला आहे. परंतु विद्यापीठाने स्पष्ट भूमिका घेतली नाही. सूत्रांच्या म्हणण्यानुसार, चौकशी समितीकडे दाखल झालेल्या तक्रारींमध्ये शिर्के यांनी ‘नामदेव साहेबराव डुकरे’ असे नाव बदलून ‘विठ्ठल शिर्के’ असे नाव धारण केले आहे. तसेच त्यांची मूळ जन्म तारीख ‘१९६२’ असताना सेवापुस्तिकेत खाडाखोड करून ‘१९६४’ असे घुसवले गेले आहे.

मूळ जन्मतारखेनुसार ते २०२२ मध्ये निवृत्त होणे अपेक्षित होते. परंतु ते निवृत्तीनंतरही ते आज पदांवर आहेत. ‘‘खोट्या दस्तावेजांच्या आधारे त्यांनी विविध पदांवर बसून घेतलेले सर्व निर्णय अवैध ठरतात. त्यांना तत्काळ पदमुक्त करावे, त्यांची चौकशी करीत फौजदारी कारवाई करावी,’’ अशी लेखी मागणी केली आहे. याबाबत विद्यापीठातील प्राध्यापकांसह दोन संस्थांनी देखील पोलिस व विद्यापीठाकडे पत्रव्यवहार केल्याचे सांगण्यात आले. या प्रकरणी चौकशी समिती नियुक्त होताच, विद्यापीठात काही संशयास्पद घडामोडी झाल्या असल्याचे शास्त्रज्ञांचे म्हणणे आहे.

विशेष म्हणजे, विद्यापीठातून शिर्के यांचे सेवापुस्तक गायब झाले आहे. तसेच कुलसचिव कार्यालयाने समितीला कागदपत्रे देण्यास नकार दिला आहे. समितीदेखील अहवाल देण्यास तयार नाही. याबाबत कृषी परिषद, कुलसचिव कार्यालय आणि चौकशी समितीदेखील हालचाल करण्यास तयार नसल्यामुळे या प्रकरणाचा उलगडा होण्याची शक्यता कमी आहे, असे एका शास्त्रज्ञाने सांगितले.

चौकशी समितीला मिळालेल्या कागदपत्रात, शिर्के यांचे नाव ‘नामदेव डुकरे’ व जन्म तारीख ‘१९६२’ अशी आहे. त्यामुळे तक्रारीत प्रथमदर्शनी तथ्य असल्याचे स्पष्ट झाले आहे. तसेच सेवापुस्तकातील बदल वैध आहे, असा युक्तिवाद त्यांनी केला आहे. परंतु जन्मतारखेच्या बदलाबाबत कोणताही पुरावा दिला नसल्याचे विद्यापीठातून सांगण्यात आले.