Santosh Kakde: चिखलीचे तहसीलदार संतोष काकडे विभागात अव्वल 

Buldhana News: जिवंत सातबारा तसेच पाणंद रस्ते मोकळे करण्यासाठी केलेल्या विशेष कामगिरीची दखल घेत चिखलीचे तहसीलदार संतोष काकडे यांचा अमरावती विभागात सर्वोत्कृष्ट तहसीलदार म्हणून गौरव करण्यात आला. विभागीय आयुक्त श्‍वेता सिंघल यांच्या हस्ते त्यांना सन्मानित करण्यात आले. 

चिखली येथे तहसीलदार म्हणून कार्यरत असलेले काकडे यांनी तालुक्यात जिवंत सातबारा हा अभिनव उपक्रम राबवला. हा उपक्रम नंतर प्रशासनाने जिल्ह्यातही राबवला. याची दखल घेत महसूलमंत्री चंद्रशेखर बावनकुळे यांनी विविध ठिकाणी आपल्या भाषणांमध्ये या कामगिरीचा विशेष उल्लेख तर केलाच शिवाय अभियानाची वैयक्तिक माहितीसुद्धा घेतली होती.

त्यांनी चिखली तालुक्यात सुमारे १८९ पाणंद रस्ते मोकळे करण्यासाठी यंत्रणा राबवली. यामुळे तालुक्यातील शेतकऱ्यांना मोठा फायदा झाला. सोबतच ते विविध प्रकारचे अभिनव उपक्रम आपल्या तहसीलस्तरावर राबवत असल्याने त्यांच्या कामाची पावती म्हणून अमरावती विभागातून सर्वोत्कृष्ट तहसीलदार म्हणून त्यांना सन्मानित करण्यात आले.

या कामगिरी व सन्मानासाठी त्यांचे सर्वच स्तरातून अभिनंदन होत आहे. आपण केवळ काम केले. याचे संपूर्ण श्रेय शेतकरी, सामान्य नागरिक आणि महसूल विभागाच्या कर्मचाऱ्यांना जाते, असे त्यांनी या निमित्ताने सांगितले. 

या सन्मानावेळी अप्पर आयुक्त (न्याय शाखा) सूरज वाघमारे, अप्पर आयुक्त(महसूल) अजय लहाने, अप्पर आयुक्त (सामान्य प्रशासन) रामदास सिद्धभट्टी, अप्पर आयुक्त (विकास आस्थापना) संतोष कवडे, अप्पर जिल्हाधिकारी अनिल खंडागळे, सहायक आयुक्त (नगरपालिका प्रशासन) श्री. कापडणीस, सहायक आयुक्त (पुनर्वसन) किरण पानबुडे, सहायक आयुक्त (विकास) राजीव फडके, प्रादेशिक चौकशी अधिकारी विठ्ठल इनामदार यांची प्रमुख उपस्थिती होती.