Ladki Bahin Yojana : लाडक्या बहीणींसाठी खुशखबर! आजपासून मिळणार डिसेंबरचे पैसे

CM Devendra Fadnavis : गेल्या काही दिवसांपासून मुख्यमंत्री माझी लाडकी बहीण योजनेबाबत अफवा पसरवल्या जात होत्या. मात्र आता डिसेंबर महिन्याच्या हप्त्याचे पैसै आजपासूनच वर्ग केले जातील, अशी घोषणा मुख्यमंत्री देवेंद्र फडणवीस यांनी केली आहे. आजपासून लाडक्या बहिणींना सहावा हप्ता वर्ग केला जाणार आहे. पण महायुतीच्या घोषणेप्रमाणे २१०० नाही तर पूर्वीप्रमाणेच १५०० रूपये दिले जाणार आहेत.

३५०० कोटी रुपयांची तरतूद

डिसेंबरचा हप्ता आजपासून वर्ग करण्यात येणार असून महायुती सरकारने ३ हजार ५०० कोटी रुपयांची तरतूद केली आहे. योजनेची रक्कम दोन टप्प्यात वर्ग करण्यात करण्यात येणार असून पहिल्या टप्प्यात २ कोटी ३५ लाख महिलांना १५०० रुपयांप्रमाणे पैसे दिले जाणार आहेत. तर दुसऱ्या टप्प्यात निवडणुकीनंतर २५ लाख आलेल्या अर्जांची छाननी केल्यानंतर पैसे मिळणार आहेत.

पाच हप्ते वर्ग

मुख्यमंत्री माझी लाडकी बहीण योजनेचे पाच हप्ते याआधीच पात्र लाभार्थी महिलांना देण्यात आले आहेत. जुलै ते नोव्हेंबरपर्यंतचे एकूण ७ हजार ५०० रूपये महिलांच्या खात्यात जमा करण्यात आले होते. आता डिसेंबरच्या हप्त्याची रक्कम आजपासून महिलांच्या खात्यात वर्ग होणार आहे. यामुळे लाडक्या बहिणींची प्रतीक्षा संपली आहे.

२१०० रुपयांची घोषणा

विधानसभा निवडणुकीवेळी मुख्यमंत्री माझी लाडकी बहीण योजनेच्या रक्कमेत वाढ केली जाईल, अशी ग्वाही महायुतीच्या नेत्यांनी दिली होती. सध्या योजनेतून १५०० रूपये दिले जात असून त्यात ७०० रूपयांची वाढ केली जाईल, योजनेची रक्कम २१०० करू असेही आश्वासन फडणवीस यांनी दिले होते.

योजनेचा सहावा हप्ता हिवाळी अधिवेशन संपताच लाडक्या बहिणींच्या खात्यात रक्कम वर्ग केला जाईल, असेही फडणवीस यांनी सांगितले होते. यामुळे योजनेचा सहावा हप्ता १५०० रूपये असणार की २१०० रूपये याकडे पात्र लाभार्थी महिलांचे लक्ष लागले होते. पण आता सहावा हप्ता हा १५०० रुपये प्रमाणेच दिला जाणार आहे.