Mango Blossom Drop Issue : ढगाळ वातावरणामुळे मोहर गळतीमध्ये वाढ

Mumbai News : डहाणू तालुक्यात दोन-तीन दिवसांपासून ढगाळ वातावरणामुळे आंबा मोहर, भाजीपाला, शेवगा, वाल आणि हरभरा पिकांना मोठा फटका बसत आहे. याआधीच पावसामुळे भातपिकांचे मोठे नुकसान झाले होते. त्यात आता ढगाळ वातावरणामुळे आंबा मोहर गळतीची समस्या वाढली आहे. त्यामुळे बागायतदार चिंतेत सापडले आहेत.

आंब्याला मोहर लागल्यानंतर वातावरण ढगाळ झाल्यास तो गळून पडतो. यंदा आंब्याला कमी मोहोर आल्याने उत्पादनावर आधीच मर्यादा आली आहे. आता या फुलगळतीमुळे शेतकऱ्यांचे आर्थिक नुकसान वाढले आहे.

याशिवाय भाजीपाला व हरभऱ्याच्या पिकांचीही वाढ मंदावली असून शेतकऱ्यांपुढे मोठे संकट उभे ठाकले आहे. भाजीपाला विक्रीतून मिळणारे उत्पन्न हा शेतकऱ्यांचा महत्त्वाचा आधार बनला आहे. मात्र ढगाळ हवामानामुळे या उत्पन्नावरही परिणाम होण्याची शक्यता आहे. हवामानातील बदलत्या अनिश्चिततेमुळे शेतकऱ्यांचे नुकसानीचे प्रमाण अधिक वाढण्याची भीती आहे.