Bajari Sowing : खानदेशात बाजरीची पेरणी सुरू

Jalgaon News : खानदेशात बाजरीची पेरणी सुरू झाली आहे. यंदा क्षेत्र स्थिर राहू शकते. अनेकांनी कापूस लागवड कमी केली आहे. यामुळे बाजरीची पेरणी स्थिर राहील. खानदेशात सुमारे साडेनऊ हजार हेक्टरपर्यंत पेरणी जाऊ शकते, असा अंदाज आहे.

बाजरीची पेरणी खानदेशात साडेसहा हजार हेक्टरवर अपेक्षित होती. परंतु वेळेत पाऊस आल्याने मूग, उडीद, सोयाबीन, कापूस यांची पेरणी वेळेत झाली. यामुळे पेरणीत वाढ होणार नाही. अनेकांनी कापूस लागवड कमी केली आहे. चारा व धान्यासाठी बाजरीची पेरणी करण्यास शेतकरी पसंती देत आहेत.

यामुळे बाजरीची पेरणी स्थिर राहणार आहे. केळी पट्ट्यातही बेवडसाठी बाजरी पेरणी करण्यात येत आहे. जळगाव जिल्ह्यात जळगाव, चोपडा, जामनेर, पाचोरा भागात पपईची काढणी पूर्ण झालेल्या क्षेत्रात बेवडसाठी बाजरीची पेरणी झाली आहे.

तर रावेर, मुक्ताईनगर, यावल, धुळ्यातील शिरपूर, नंदुरबारातील शहादा, तळोदा भागात केळी व इतर पिकांना बेवड, जमीन सुपीकता यासाठी बाजरीची पेरणी झाली आहे. काळ्या कसदार जमिनीत पेरणी अधिक आह.

बाजरीचे दरही २२०० ते २३०० रुपये प्रतिक्विंटल, असे टिकून होते. चाऱ्यासही मागणी असते. चाऱ्याचे दर वधारले आहेत. बाजरीचा चारा दुधाळ पशुधनाला सकस मानला जातो. यामुळे बाजरी पेरणीवर दूध उत्पादक व अन्य शेतकऱ्यांनी भर दिला आहे. बाजरी पेरणीस या महिन्यात सुरवात झाली आहे.

मागील महिन्यात अनेकांनी आगाप पेरणी केली आहे. या महिन्याच्या पहिल्या आठवड्यात बाजरी पेरणीस वेग आला. पेरणी अद्यापही सुरू आहे. पेरणी पुढे सात ते आठ दिवस सुरू राहील, असेही संकेत आहेत.

जळगाव जिल्ह्यात अधिकची पेरणी

बाजरीची सुमारे साडेचार हजार हेक्टरवर पेरणी जळगाव जिल्ह्यात होईल, असा अंदाज आहे. तर धुळे व नंदुरबारात मिळून सुमारे साडेपाच हजार हेक्टरवर बाजरी असणार आहे. जळगाव जिल्ह्यात पाचोरा, भडगाव, पारोळा, अमळनेर, चाळीसगाव, जामनेर, मुक्ताईनगर, चोपडा, धुळ्यात शिरपूर, शिंदखेडा, साक्री, धुळे, नंदुरबारात शहादा, नवापूर, तळोदा, नंदुरबार भागात बाजरीची पेरणी बऱ्यापैकी होईल. धुळ्यातील शिंदखेडा तालुका बाजरीत आघाडीवर आहे.