Crop Harvesting Khandesh : खानदेशात कांदा, बाजरी काढणी सुरूच

Jalgaon News : खानदेशात पावसाचा धुमाकूळ सुरूच आहे. यात उशिराचा कांदा व बाजरी पिकात काढणी, मळणीचे काम सुरूच आहे. पावसामुळे शेतकऱ्यांची मोठी धावपळ होत असून, मजूरटंचाईचा फटकाही बसत आहे.

खानदेशात कांद्याची सुमारे ३८ हजार हेक्टरवर लागवड झाली होती. एकट्या धुळे जिल्ह्यातील लागवड २० हजार हेक्टर होती. तर जळगाव जिल्ह्यातील कांदा लागवड सुमारे १२ हजार हेक्टरवर होती.

तर नंदुरबारमधील लागवड सुमारे सहा हजार हेक्टरवर झाली होती. कांदा पिकावर मोठा खर्चही शेतकऱ्यांनी केला. परंतु दर कमी मिळाले. त्यात ज्यांनी जानेवारी अखेरीस व फेब्रुवारीत कांदा लागवड केली, त्यांची कांदा काढणी मे च्या मध्यात सुरू झाली. तसेच ज्यांनी बाजरीची पेरणी फेब्रुवारीत केली, त्यांची बाजरी काढणीदेखील मे मध्ये सुरू झाली.

ही पिके काढणी, मळणीवर येतानाच ६ मे पासून खानदेशात वादळी पाऊस, गारपिटीचे संकट आले. यात केळीसह कांदा, बाजरी पिकाची अतोनात हानी झाली आहे. कांद्याचे भिजून नुकसान झाल्याने शेतकऱ्यांना मोठा वित्तीय फटका बसला आहे. बाजरी आडवी झाल्याने त्यात दाणे बारीक पडले. त्यात उत्पादन कमी येत आहे. बाजरीचा चाराही अनेकांच्या हाती येणार नाही, अशी स्थिती आहे.

एकिकडे पावसामुळे शेतकऱ्यांची धावपळ होत असताना मजूर उपलब्ध होत नसल्याने काढणी, मळणीमध्ये अडचणी येत आहेत. अन्य गावांमधून मजूर आणून शेतात कामे आवरून घ्यावी लागत आहेत. शेतकरी संकटात सापडल्याने त्यांना मदतीची गरज आहे. नुकसानीचे पंचनामे करून मदतनिधी मिळावा, अशी मागणी केली जात आहे.

मक्यासही फटका

मका पिकाचीदेखील अनेकांनी फेब्रुवारीत लागवड केली होती. या पिकाची काढणीदेखील मे मध्ये सुरू झाली. यात पाऊस आल्याने मक्याची मळणी, कापणी थांबली. अनेकांचा मका चारा शेतात होता. त्याची नासाडी पावसाने झाली आहे.

खानदेशात सुमारे २५ ते३० हजार हेक्टरवरील मक्यास पावसाने फटका बसला आहे. अजूनही कापणी, मळणीचे काम सुरू आहे. मागील दोन दिवस काही भागांचा अपवाद वगळता पाऊस झालेला नाही. पाऊस नसल्याने बाजरी, कांदा व मका काढणी, मळणीच्या कामास गती आली आहे. शेतकरी आपल्या कुटुंबीयांसह मजुरांच्या मदतीने काढणी, मळणीचे काम करीत आहेत.