Ambadas Danve: विधान परिषदेचे विरोधी पक्षनेते अंबादास दानवे निवृत्त

Mumbai News: विधान परिषदेचे विरोधी पक्षनेते अंबादास दानवे यांचा निरोप समारंभ बुधवारी पार पडला असला, तरी अद्याप ४४ दिवसांचा कालावधी त्यांच्याकडे आहे. श्री. दानवे यांचा कार्यकाळ संपल्याने ते निवृत्त होत असून काँग्रेसच्या सतेज पाटील यांना संधी देण्यात येणार असल्याचे निश्चित आहे. मात्र, पुढील अधिवेशनापर्यंत त्यांना प्रतीक्षा करावी लागणार आहे.

दरम्यान, श्री. दानवे यांच्या निरोप समारंभाच्या भाषणात मुख्यमंत्री देवेंद्र फडणवीस यांनी शिवसेने पक्षप्रमुख उद्धव ठाकरे यांना युतीचा प्रस्ताव देत सूचक वक्तव्य केले. श्री. फडणवीस यांनी भाषणात श्री. ठाकरेंवर थेट निशाणा साधत म्हटले, की ठाकरे साहेब, आता २०२९ पर्यंत तुम्ही काही करायचे नाही म्हणता.

पण आमचे तिकडे जाण्याचे दार बंद झाले आहेत. मात्र तुम्हाला इकडे येण्याचा स्कोप आहे. आपण वेगळ्या पद्धतीने बोलू शकतो. दानवे भाजपमध्ये घडलेले नेते आहेत. ते जरी आत्ता ठाकरे गटात असले, तरी त्यांच्या मुळाशी भाजपच आहे. शिवसेना आजही आमचा मित्र पक्ष आहे, पण काही गोष्टी बदलल्या आहेत.

उपमुख्यमंत्री शिंदे यांनी उद्धव ठाकरे यांना डिवचत, दानवे सोन्याचा चमचा तोंडात घेऊन जन्माला आले नाहीत. ते स्वकर्तृत्वाने विरोधी पक्षनेतेपदापर्यंत पोहोचले आहेत, असा टोला लगावला. यानंतर ठाकरे यांनी दानवे हे मूळ भाजपचे होते, पण आमचे अनेकजण तुम्ही घेतले. अनेकजण पदे घेण्यासाठी फडफडत असतात. दानवे सोन्याचा चमचा घेऊन जन्माला आले नाहीत, पण भरल्या ताटाशी त्यांनी प्रतारणा केली नाहीत. ज्यांनी ताट वाढून दिले त्या पक्षाशी प्रतारणा केली नाही, अशा शब्दांत उपमुख्यमंत्री शिंदे यांना टोला लगावला.

सतेज पाटील यांना प्रतीक्षा

विधान परिषदेचे विरोधी पक्षनेतेपद ४४ दिवसांनी रिक्त होणार असून पुढील अधिवेशनात विरोधी पक्षनेतेपदाची निवड होण्याची शक्यता आहे. सध्या विधान परिषदेत काँग्रेसची सदस्यसंख्या जास्त आहे. त्यामुळे शिवसेनेकडून ते काँग्रेसकडे जाण्याची शक्यता आहे. कोल्हापूरचे सतेज पाटील हे दावेदार असून त्यांच्या निवडीसाठी पत्र दिले जाणार आहे.