Manikrao Kokate Controversy: कृषिमंत्री कोकाटेंची अजित पवारांकडून खरडपट्टी; कृषिमंत्र्यांनी मागितली माफी

Pune News: सतत वादात राहणाऱ्या कृषिमंत्री माणिकराव कोकाटे यांची आज उपमुख्यमंत्री अजित पवार यांनी चांगलीच कानउघाडणी केली. सतत वादग्रस्त व्यक्तव्ये कशी होतात? असा प्रश्न पवार यांनी विचारला. यावर कृषिमंत्र्यांनी आपली चूक मान्य करून यापुढे काळजी घेईल, असे आश्वासन दिले. त्यामुळे कृषिमंत्र्यांच्या राजिनाम्याच्या चर्चेवर सद्यातरी निर्णय घेण्यात आला नाही. 

या बैठकीत अजित पवारांनी कोकाटे यांना स्पष्ट शब्दांत सांगितले की, त्यांच्या बेताल वक्तव्यांमुळे सरकार आणि पक्षाचे मोठे नुकसान होत आहे. "माध्यमांसमोर बोलताना तुम्हाला काय बोलायचे आहे, याचे भान ठेवले पाहिजे," असे अजित पवारांनी कोकाटे यांना बजावले. यावर कोकाटे यांनी आपली चूक मान्य करत अजित पवार यांच्याकडे दिलगिरी व्यक्त केली.

तसेच, यापुढे बोलताना आणि वागताना अधिक काळजी घेण्याचे आश्वासनही त्यांनी दिले. ही बैठक तब्बल दीड तास चालली, परंतु त्यानंतर कोकाटे यांनी माध्यमांशी कोणतीही चर्चा न करता थेट कॅबिनेट बैठकीसाठी रवाना झाले. त्यामुळे या बैठकीत नेमके काय घडले, याबाबत स्पष्ट माहिती मिळू शकली नाही.

या प्रकरणावरून अजित पवार कोकाटे यांचे कृषिमंत्रीपद कायम ठेवण्याच्या विचारात असल्याचे संकेत मिळत आहेत. त्यामुळे कोकाटे यांचा राजीनामा घेतला जाणार नाही, असे सध्याचे चित्र आहे. मात्र, यावरून शेतकरी आणि सामाजिक संघटनांमध्ये तीव्र नाराजी पसरली आहे.

छावा संघटनेचे प्रदेशाध्यक्ष विजय घाडगे यांनी याबाबत तीव्र शब्दांत प्रतिक्रिया व्यक्त केली आहे. ते म्हणाले, "कृषिमंत्र्यांनी वारंवार असंवेदनशील वक्तव्ये केली आहेत. त्यांचा राजीनामा घेणे हाच एकमेव पर्याय आहे. खातेबदल किंवा अन्य कोणत्याही उपायाने शेतकऱ्यांचे समाधान होणार नाही. जर कोकाटे यांचा राजीनामा घेतला गेला नाही, तर अजित पवारांना राज्यातील शेतकऱ्यांच्या रोषाला सामोरे जावे लागेल."

कोकाटे यांच्या वादग्रस्त वक्तव्यांमुळे आणि त्यांच्या कृतींमुळे शेतकऱ्यांमध्ये असंतोष वाढत आहे. यापूर्वीही विधानपरिषदेत रमी खेळण्याच्या प्रकरणाने मोठा वाद निर्माण झाला होता. या सर्व घडामोडींमुळे सरकार आणि राष्ट्रवादी कॉंग्रेस पक्षाला जनतेच्या रोषाला सामोरे जावे लागत आहे.

आता अजित पवार कोकाटे यांच्याबाबत नेमका काय निर्णय घेणार, याकडे सर्वांचे लक्ष लागले आहे. कोकाटे यांचे मंत्रीपद कायम राहणार की त्यांच्यावर कठोर कारवाई होणार, हे पाहणे औत्सुक्याचे ठरणार आहे.