Manikrao kokate Controversy: रमी खेळा आणि माझ्यासाठी पैसे जिंका; शेतकऱ्याने कृषिमंत्र्यांना मनी ऑर्डर पाठवली

Nashik News: काही दिवसांपूर्वी कृषी मंत्री माणिकराव कोकाटे यांचा रमी खेळतानाचा व्हिडिओ व्हायरल झाल्यानंतर त्यांच्यावर टिकेची झोड उठली. या पार्श्वभूमीवर आता नाशिक जिल्ह्यातील (रा.देवगाव, ता.निफाड) येथील शेतकरी राजेंद्र खुळे यांनी कृषिमंत्री कोकाटे यांना ५ हजार ५५० रुपयांची मनी ऑर्डर पाठवली आहे.

पावसामुळे शेतात पेरणी न झाल्याने आर्थिक अडचणीत सापडलेल्या खुळे यांनी "तुम्ही रमी खेळा आणि जिंकलेले पैसे मला पाठवा," असा संदेशही दिला आहे. या घटनेमुळे शेतकऱ्यांच्या व्यथा अधोरेखित झाल्या आहेत.सततच्या पावसामुळे खुळे यांच्या शेतात पाणी साचले असून पेरणी करणे अशक्य झाले आहे.

यावर्षी पेरणीसाठी महागडे सोयाबीन बियाणे विकत घेतले होते, परंतु शेतात पेरणी न झाल्याने ते तसेच पडून राहिले. यामुळे आर्थिक अडचणीत सापडलेल्या या शेतकऱ्याने
त्याच्याकडील काही सोयाबीन विकून ५ हजार ५५० रुपये मिळवले आणि हीच रक्कम त्याने कृषी मंत्री माणिकराव कोकाटे यांना मनी ऑर्डरद्वारे पाठवली आहे.

मनी ऑर्डरसह खुळे यांनी एक संदेशही पाठवला आहे. त्यामध्ये त्यांनी लिहिले आहे, "माझ्यासाठी तुम्ही रमी खेळा आणि जो डाव जिंकाल त्याचे पैसे मला पाठवा." या प्रकारे त्यांनी आपल्या अडचणींवर अप्रत्यक्ष भाष्य करत सरकारकडून मदतीची अपेक्षा व्यक्त केली आहे.
दरम्यान, कृषी मंत्री माणिकराव कोकाटे हे सध्या धुळे जिल्हा दौऱ्यावर असून शहरातील एका हॉटेलमध्ये त्यांचा मुक्काम आहे.

यावेळी राष्ट्रवादी काँग्रेस (शरद पवार गट) चे जिल्हाध्यक्ष रणजितराजे भोसले यांनी कार्यकर्त्यांसह हॉटेलसमोर काळे झेंडे दाखवत जोरदार घोषणाबाजी केली. त्याचबरोबर ठाकरे गटाच्या शिवसेनेच्या पदाधिकाऱ्यांनीही निषेध नोंदवत आंदोलन केले. या आंदोलनामुळे परिसरात काही वेळ तणाव निर्माण झाला होता.

पोलिसांनी घटनास्थळी उपस्थित होऊन आंदोलकांना समजावत परिस्थिती नियंत्रणात आणली.
या घटनेमुळे एका बाजूला शेतकऱ्यांच्या व्यथा आणि संताप अधोरेखित होत असताना, दुसरीकडे कृषी मंत्र्यांच्या विरोधातील राजकीय वातावरण अधिक तापलेले दिसत आहे.