Custard Apple Cultivation : अकोला देव येथे सीताफळ लागवडीचा प्रारंभ

Jalna News : जिल्ह्यातील जाफराबाद तालुक्यातील अकोला देव येथे ॲग्रोव्हिजन गटशेती संघाच्या स्वबळावर शाश्वत दिशादर्शक प्रायोगिक प्रकल्प अंतर्गत वार्षिक सामूहिक सीताफळ लागवडीचा शुभारंभ शुक्रवारी (ता. ११ ) करण्यात आला.

ॲग्रोव्हिजन गटशेती संघांचे संस्थापक प्रमुख संजय मोरे पाटील यांच्या हस्ते हा प्रारंभ करण्यात आला. लागवड ते थेट सामूहिक विक्री हे ॲग्रोव्हिजन गटशेती संघांचे सीताफळ लागवडीचे सामान्य शेतकऱ्यांसाठी एक परिपूर्ण मॉडेल आहे.

दत्तात्रय सवडे यांच्या शेतात पार पडलेल्या या कार्यक्रमास दत्तात्रय सवडे, सुभाष सवडे, सोमीनाथ सवडे, वैभव सवडे, अरुण भारती हे उपस्थित होते. ॲग्रोव्हिजन गटशेती संघाच्यावतीने प्रत्येक महिन्याच्या ९ तारखेला आयोजिण्यात येणारे जुलै महिन्यातील नियमित मासिक चर्चासत्र बुधवारी (ता. ९) अकोला देव येथेच अत्यंत उत्साहात पार पडले.

या वेळी भर पावसात चाललेली शिवारफेरी विशेष रंगली. अकोला देव येथील शेतीनिष्ठ शेतकरी दत्तात्रय सवडे हे आपल्या शेततळ्याच्या पाण्यावर उत्कृष्टरीत्या जोपासत असलेल्या सीताफळ बागेत शिवारफेरी घेण्यात आली. यावेळी परिसरातील शिवारात असलेल्या शेतवस्तीवर नियमित मासिक चर्चासत्र पार पडले.

या चर्चासत्रात खजूर लागवड, कांदा लागवड, बांबू लागवड, दुग्धोत्पादन या विषयांवर चर्चा होऊन जमीन व माती वाचविण्यासाठी नैसर्गिक पद्धतीने शेती करण्याची गरज व्यक्त करण्यात आली.

यावेळी ॲग्रोव्हिजन गटशेती संघांचे संस्थापक प्रमुख संजय मोरे पाटील, नंदकिशोर देशमुख, विश्वासराव देशमुख, आंबेगावचे दत्तात्रय देठे, पंढरीनाथ देठे, नळविहिराचे आत्माराम लोखंडे, अकोला देवचे सुधीर जोशी, शालिकराम सवडे, दत्तात्रय सवडे, ज्ञानेश्वर सवडे, सोमीनाथ सवडे, वैभव सवडे उपस्थित होते. पुढील महिन्यातील ९ ऑगस्टचे नियमित मासिक चर्चासत्र बदनापूर तालुक्यातील भराडखेडा येथे घेण्याचे यावेळी निश्चित करण्यात आले.