Crop Damage : नागपूर कृषी विभागाच्या लेखी केवळ ८० हेक्‍टर नुकसान

Nagpur News : अमरावती जिल्ह्यात एप्रिल महिन्यात झालेल्या पावसामुळे १५५ कोटी रुपयांचे नुकसान नोंदविण्यात आले. त्याच वेळी नागपूर जिल्ह्यात मात्र याच महिन्यात केवळ ८० हेक्‍टरमधील पिकांचे नुकसान दर्शविण्यात आल्याने शेतकऱ्यांमध्ये रोष व्यक्‍त होत आहे.

गेल्या काही महिन्यांपासून नागपूर जिल्ह्यात सातत्याने वादळी वाऱ्यासह पाऊस व गारपीट होत आहे. त्याचा फटका उशिरा कापणीला आलेला गहू, हरभऱ्यासह भाजीपाला व फळपिकांना बसला. संत्रा-मोसंबीचे देखील यामुळे नुकसान झाले. एप्रिल महिन्यात हे नुकसान झाले.

मात्र याच काळात प्रशासकीय यंत्रणा लोकसभा निवडणुकीत व्यस्त असल्याने नुकसान सर्व्हेक्षण व पंचनाम्याचे काम अपेक्षित झाले नाही. त्यामुळेच मोठ्या प्रमाणावर नुकसान झाले असतानाच त्याची नोंद अवघी ८० हेक्‍टर इतकीच घेण्यात आली, असा आरोप केला जात आहे. काही शेतकऱ्यांनी तर निवडणूक कामात व्यस्त असल्याचे सांगत काही अधिकाऱ्यांकडून कार्यालयात टेबलवर बसूनच हे सर्व्हेक्षण करण्यात आल्याचा गंभीर आरोप केला आहे.

यामध्ये राजकीय हस्तक्षेप असल्याचेही काही शेतकऱ्यांचे म्हणणे आहे. काटोल, नरखेड तालुक्‍यातील शेतकऱ्यांनी हा गंभीर प्रकार जिल्हा अधीक्षक कृषी अधिकारी रवींद्र मनोहरे या भागात दौऱ्यावर असताना त्यांच्या निदर्शनास आणून दिला. या वेळी उपविभागीय कृषी अधिकारी टी. के. चौधरी, डॉ. प्रवीण दवणे, विक्रम भवारी, कुणाल ठाकूर, राकेश वसु, महाऑरेंजचे संचालक मनोज जवंजाळ देखील उपस्थित होते.

अमरावतीला भरपाई, नागपूर वगळला

गारपीट, पाऊस कोसळून गेल्यावर झाडावर बुरशीचा प्रादुर्भाव वाढत नंतर चार ते पाच दिवसांनी फळगळती होते. त्यामुळे सर्व्हेक्षण व पंचनाम्यात याची नोंद तत्काळ घेणे शक्‍य होत नाही. अमरावतीत यापूर्वी नैसर्गिक आपत्तीत नोंद घेत सर्व्हेक्षण करून मदत देण्यात आली होती. या वेळी देखील अमरावतीमध्ये १३७ कोटी रुपयांच्या संत्रा पिकाचे नुकसान झाल्याचा अहवाल आहे. त्याच वेळी नागपूर जिल्ह्यात मात्र हे नुकसान अवघे ८० हेक्‍टर दाखविण्यात आले आहे.