Agro Tourism: कृषी-पर्यटनाच्या माध्यमातून ग्रामीण विकासाचा नवा अध्याय

Parbhani News: कुमारगंज, अयोध्या (उत्तर प्रदेश) येथील आचार्य नरेंद्र देव कृषी आणि तंत्रज्ञान विद्यापीठ व नवी दिल्ली येथील भारतीय कृषी विद्यापीठ संघ यांच्यातर्फे आयोजित भारतीय कृषी विद्यापीठांच्या कुलगुरूंचे ४८ वे अधिवेशन गुरुवारी (ता. १३) आणि शुक्रवारी (ता. १४) कुमारगंज, अयोध्या येथे पार पडले.

या अधिवेशनाची प्रमुख संकल्पना भारतामध्ये ‘कृषी-पर्यटन : शिक्षण व ग्रामीण विकास यांच्यातील दुवा’ ही होती. कृषी पर्यटनाच्या माध्यमातून ग्रामीण विकासाला चालना मिळू शकेल, असा सूर या अधिवेशनात उमटला असे वसंतराव नाईक मराठवाडा कृषी विद्यापीठाचे कुलगुरू डॉ. इंद्र मणी मिश्रा यांनी सांगितले.

या अधिवेशनात डॉ. इंद्र मणी यांचे प्रमुख व्याख्यान झाले आणि तज्ज्ञ पॅनेल चर्चेमध्ये त्यांनी महत्त्वपूर्ण भूमिका बजावली. भारतामध्ये महाराष्ट्र राज्याने सर्वप्रथम कृषी-पर्यटन संकल्पना स्वीकारली असून राष्ट्रीय स्तरावर या उपक्रमाची प्रशंसा करण्यात आली. प्रत्येक तालुक्यात एक कृषी-पर्यटन केंद्र स्थापन करणे गरजेचे आहे.

वसंतराव नाईक मराठवाडा कृषी विद्यापीठामध्ये परभणी येथे जुलै-ऑगस्ट २०२५ दरम्यान कृषी-पर्यटनविषयक परिसंवाद आयोजित करण्याचा निर्णय घेण्यात आला. या अधिवेशनात उत्कृष्ट पीएच. डी. प्रबंध आणि सर्वोत्तम प्राध्यापक पुरस्कार प्रदान करण्याचा निर्णय देखील घेण्यात आला असल्याचे डॉ. इंद्र मणी यांनी सांगितले.

या अधिवेशनात देशभरातील विविध कृषी विद्यापीठांचे कुलगुरू यांची उपस्थिती होती. कृषी-पर्यटनाच्या माध्यमातून ग्रामीण अर्थव्यवस्थेला चालना देण्यासाठी आवश्यक विविध उपायांवर चर्चा करण्यात आली. डॉ. इंद्र मणी यांच्या अभ्यासपूर्ण मांडणीमुळे या क्षेत्रातील संशोधन आणि धोरणे अधिक प्रभावीपणे राबवण्याच्या दृष्टीने मौलिक विचारमंथन घडले.

आचार्य नरेंद्र देव कृषी आणि तंत्रज्ञान विद्यापीठाचे कुलगुरू डॉ. बिजेंद्र सिंह यांच्या हस्ते स्मृतिचिन्ह देऊन सन्मान करण्यात आला. या अधिवेशनामुळे कृषी-पर्यटनासंबंधी नव्या संधी उघडण्यास मदत होईल आणि ग्रामीण भारताच्या सर्वांगीण विकासात सकारात्मक योगदान देईल, असा विश्‍वास व्यक्त करण्यात आला.