Mula Dam Storage: मुळा धरणात ७५ टक्के पाणीसाठा  

Ahilyanagar News: मुळा धरणात मंगळवारी (ता. २२) ७५ टक्के पाणीसाठा झाला आहे. धरणात एकूण १९ हजार ३६१ दशलक्ष घनफूट (सव्वाएकोणीस टीएमसी) पाणी जमा झाले आहे. अकोले तालुक्यात पाणलोटात पावसाचे प्रमाण कमी आहे.

त्यामुळे कोतूळ येथे सरिता मापन केंद्रापासून मुळा नदीपात्रातून धरणात मंगळवारी सकाळी आठ वाजता २२४७ क्युसेकने नवीन पाण्याची आवक सुरू होती. ३१ जुलैपर्यंत धरणसाठा २१,८०९ दशलक्ष घनफूट (८३.९१ टक्के) स्थिर ठेवण्यात येणार असल्याचे सांगण्यात आले. 

मुळा धरणाच्या पाणलोट क्षेत्रात यंदाच्या वर्षी मे व जून महिन्यात सरासरीपेक्षा जास्त पाऊस झाला. जुलै महिन्याच्या पहिल्या आठवड्यात धरणाच्या पाणलोट क्षेत्रात पावसाने जोरदार कामगिरी केली. त्यामुळे बुधवारी (ता. ९) सायंकाळी पाच वाजता धरणाचे सर्व ११ दरवाजे उघडण्यात आले.

मुळा धरण जलाशय परिचालन सूचीनुसार धरणसाठा १८,१५५ दशलक्ष घनफूट (६९.८३ टक्के) स्थिर ठेवून मुळा नदीपात्राद्वारे जायकवाडीला पाणी सोडण्यात आले. बुधवारी (ता. १६) धरणाचे दरवाजे पुन्हा बंद करण्यात आले. या आठवड्यात मुळा धरणातून जायकवाडी धरणासाठी ४,५०० दशलक्ष घनफूट पाण्याचा विसर्ग झाला.

आता मुळा धरण परिचालन सूचीनुसार १६ ते ३१ जुलैदरम्यान धरणसाठा २१,८०९ दशलक्ष घनफूट (८३.९१ टक्के) स्थिर ठेवण्यात येणार आहे. त्यानुसार सध्या धरणसाठा १९ हजार ३६१ दशलक्ष घनफूट (सव्वा एकोणीस टीएमसी) (७५ टक्के) झाला आहे. धरणाच्या पाणलोटात सध्या पावसाने ओढ दिली आहे. त्यामुळे आवक कमी झाली आहे.

जुलैअखेर विसर्ग शक्यता कमी

सध्या पाणलोटात पाऊस कमी असल्याने पाण्याची आवक कमी आहे. त्यामुळे अशीच स्थिती राहिली तर जुलैच्या अखेरीस पाणी विसर्ग होण्याची शक्यता कमी आहे. भंडारदरा, निळवंडे धरणातूनही विसर्ग थांबवला आहे.