Hapus Mango Blossom : सिंधुदुर्गात ५० टक्के हापूस कलमांना मोहर

Sindhudurg News : सिंधुदुर्ग जिल्ह्यातील किनारपट्टी तालुक्यातील ५० टक्क्यांहून अधिक हापूस कलमांना मोहर आला असून, उर्वरित कलमांना मोहर येण्यासाठी सध्या अनुकूल वातावरण आहे. त्यामुळे पुढील दहा ते बारा दिवसांत ८० टक्के कलमांना मोहर येण्याची शक्यता आहे.

लांबलेल्या पावसामुळे या वर्षी हापूस हंगाम लांबणार हे यापूर्वीच स्पष्ट झाले आहे. पावसामुळे हापूसच्या कलमांना ऑक्टोबर, नोव्हेंबरमध्ये मोहर येण्याऐवजी पालवी आली. त्यामुळे दर वर्षीच्या तुलनेत हंगाम महिनाभर लांबणार आहे. नोव्हेंबरच्या पहिल्या आठवड्यात पडणारी थंडी अखेरच्या आठवड्यात सुरुवात झाली.

त्यामुळे गेल्या वीस ते पंचवीस दिवसांत हापूसला चांगला मोहर फुटू लागला आहे. विशेषतः किनारपट्टीच्या देवगड, मालवण, वेंगुर्ला या तालुक्यांमध्ये कलमे मोहराने बहरल्याचे चित्र दिसत आहे. कुडाळ आणि सावंतवाडी तालुक्यांच्या पश्चिमेकडील भागात देखील मोहर येत असल्याचे दिसून येत आहे. सध्या थंडीचे प्रमाण जिल्ह्यात चांगले असल्यामुळे उर्वरित झाडांना देखील येत्या दहा ते पंधरा दिवसांत चांगला मोहर येण्याचा अंदाज आहे.

एकीकडे पश्चिमेकडील हापूसच्या झाडांना जरी मोहर येत असला तरी पूर्वपट्ट्यात एखादा दुसरा अपवाद वगळता अजूनही मोहर फुटण्याची प्रक्रिया सुरू झालेली नाही. त्यामुळे या भागातील हंगाम अधिकच लांबणार आहे. मे अखेरीस किंवा त्यानंतर देखील येथील आंबा चाखायला मिळण्याची शक्यता आहे.