Mango Blossom : बोर्डीमध्ये प्रतिकूल वातावरणामुळे मोहोर लांबणीवर

Bordi News : गेल्या काही दिवसांपासून बोर्डी परिसरात प्रतिकूल वातावरणामुळे आंब्याला मोहोर येण्याची प्रक्रिया लांबली आहे. मागील चार दिवसांपासून ढगाळ वातावरण व संध्याकाळच्या वेळी धूरसदृश हवामान निर्माण होत असल्यामुळे आंबा बागायतदार, तसेच भाजीपाला उत्पादक शेतकऱ्यांमध्ये चिंतेचे वातावरण पसरले आहे.

डहाणू तालुक्याच्या उत्तरेकडील नरपड, चिखले, घोलवड, बोर्डी, रामपूर, अस्वली, जांबुगाव, चिंबावे, वाकी, झारली अशा सुमारे १५ गावांच्या परिसरात मोठ्या प्रमाणात चिकू, आंबा बागायती आहेत. साधारणपणे दरवर्षी डिसेंबर ते जानेवारीमध्ये आंब्याच्या झाडांना मोहोर येण्याची प्रक्रिया सुरू होते, असा बागायतदारांचा अनुभव आहे;

परंतु मागच्या सात-आठ वर्षांपासून डिसेंबरमध्ये अपेक्षित थंडी पडत नसल्यामुळे मोहोर येण्याची प्रक्रिया फेब्रुवारीच्या शेवटच्या आठवड्यापासून सुरू होत असल्याचे दिसून येते. गेल्या सप्टेंबरमध्येच पावसाने काढता पाय घेतल्यामुळे चालू वर्षी मोहोर येण्याची प्रक्रिया लवकर सुरू होईल, असा अंदाज व्यक्त केला जात होता.

या अनुषंगाने शेतकऱ्यांनी आंबा बागायतीमध्ये खत-पाणी व्यवस्थापन, तसेच कीटकनाशक फवारणी आदी आवश्यक मशागतीवर मोठा खर्च केला; परंतु फेब्रुवारीच्या शेवटच्या आठवड्यापर्यंत आंब्याच्या झाडांना मोहोर येण्याची प्रक्रिया अतिशय संथ गतीने होत असल्याचे दिसून येत आहे. त्यातच वातावरणात बदल होत असल्यामुळे मोहोर येण्याची प्रक्रिया लांबली आहे. यावर्षी शेतकऱ्यांना आंबा बागायतीमध्ये निराशादायी चित्र दिसत आहे.

गेल्यावर्षीही निराशा

२०२३च्या हंगामात आंबा बागायती चांगल्या बहरल्या होत्या; परंतु मेच्या १६ तारखेपासून बिपरजॉय चक्रीवादळाने आंब्याचे पीक झोडपून काढल्याने शेतकऱ्यांना मोठा फटका बसला होता. तसेच चिकू बागायतदारांनाही पावसाळी हंगामात फळांची आवक कमी झाल्यामुळे नुकसान झाले होते. चालू वर्षाच्या सुरुवातीपासून काही प्रमाणात परिस्थिती सुधारेल, या आशेने पुन्हा एकदा कामाला लागलेला शेतकरी नैसर्गिक आपत्तीमध्ये गुरफटला गेला आहे.