Well Repair Subsidy : जुनी विहीर दुरुस्तीसाठी १४४ लाभार्थ्यांचे लक्ष्य

Nagpur News : नागपुर जिल्हा परिषदेच्या कृषी विभागाने शेतकऱ्यांच्या खचलेल्या विहिरींच्या दुरुस्तीसाठी पहिल्यांदाच शेष फंडातून अनुदान देण्याचा निर्णय घेतला. या निधीतून १४४ लाभार्थ्यांना अनुदान देण्याचे निश्चित असून अर्ज मात्र दुप्पटीवर आले आहेत.

नुकत्याच झालेल्या कृषी समितीच्या बैठकीत पात्र लाभार्थ्यांच्या यादीला मंजुरी मिळाल्याची माहिती आहे. उर्वरित, पात्र लाभार्थी शेतकऱ्यांना नेमका कसा लाभ देण्यात येईल, हे अद्याप निश्‍चित करण्यात आले नाही. या योजनेचा लाभ घेण्यासाठी सातबारावर विहीर असल्याचा उल्लेख असणे आवश्यक आहे.

विहीर शेतकऱ्याने स्वखर्चातूनन अर्थात कुठल्याही योजनेचा लाभ न घेता बांधली असावी, अशी अट आहे. पावसाच्या दिवसात किंवा अतिवृष्टीने सिमेंटच्या विहिरीसह पक्के बांधकाम नसलेल्या विहिरी खचतात. या विहिरींचे दुरुस्ती काम करणे ही खर्चीक बाब असल्याने शेतकरी त्या जैसे थे अवस्थेत ठेवतात.

परंतु या विहिरींच्या पाण्याच्या ‘ओव्हर फ्लो’मुळे शेतातील इतर पिके खराब होतात. हा मोठा फटका शेतकऱ्यांना असतो. आता या योजनेच्या लाभामुळे ही वेळ शेतकऱ्यांवर येणार नाही. २०२३-२४ या वर्षाकरिता इतर व सर्वसाधारण प्रवर्गातील शेतकऱ्यांकरिता जुनी विहीर दुरुस्तीकरिता ७५ टक्के किंवा ५० हजार रुपयांच्या मर्यादेत अनुदान देण्याची तरतूद करण्यात आली.

यासाठी सेस फंडात ७२ लाख ७९ हजार २०० रुपयांची तरतूद करण्यात आली. १४४ शेतकऱ्यांना याचा लाभ मिळेल. परंतु अर्ज ३०० च्या जवळपास आलेत. जिल्हा परिषदेच्या या योजनेला शेतकऱ्यांकडून चांगला प्रतिसाद मिळत असल्याचे दिसत आहे.