Fodder Shortage : हिरव्या चाऱ्याच्या टंचाईमुळे उसावर कोयता

Pandharpur News : ऑगस्ट महिना संपत आला तरी अद्यापही समाधानकारक पाऊस न पडल्याने यावर्षी जनावरांसाठी हिरव्या चाऱ्याची टंचाई सर्वत्र जाणवू लागली आहे. मका, कडवळ हा हिरवा चारा पुरेशा प्रमाणात उपलब्ध होत नसल्याने पशुपालक नाइलाजास्तव ऊस पिकाचा वापर चारा म्हणून करत आहेत.

येथील कृषी उत्पन्न बाजार समितीच्या आवारातील वैरण बाजारामध्ये उसाची आवक वाढली असून, ऊस खरेदीसाठी पशुपालकांची गर्दी झाल्याचे चित्र दिसून येत आहे.

पंढरपूर तालुका हा जवळपास १०० टक्के बागायती असल्यामुळे पशुपालकांनी दूध उत्पादनासाठी मोठ्या प्रमाणावर पशुधन जोपासले आहे.

तालुक्यामध्ये सुमारे ८९ हजार म्हशी तर ९१ हजार गाई असे एकूण एक लाख ८० हजार पशुधनाची संख्या आहे. हे पशुधन जोपासण्यासाठी हिरवा चाराही तितक्याच मोठ्या प्रमाणावर लागतो.