Weather Update : तापमानातील वाढ कायम राहणार

पुणे : उत्तरेकडून वाहणाऱ्या थंड वाऱ्यांच्या (Cold Wind) अभावामुळे राज्यात गारठा (Cold Weather) कमी झाला आहे. दुपारी उन्हाचा चटका (Heat) वाढला असून, ढगाळ आकाशामुळे उकाड्यात वाढ झाली आहे. राज्याच्या कमाल, किमान तापमानातील (Temperature) वाढ कायम राहण्याची शक्यता हवामान विभागाने वर्तविली आहे.

आग्नेय अरबी समुद्रात समुद्र सपाटीपासून ३.१ किलोमीटर उंचीपर्यंत चक्राकार वाऱ्यांची स्थिती निवळली आहे. तर पूर्व मध्य बंगालच्या उपसागरामध्ये समुद्र सपाटीपासून १.५ किलोमीटर उंचीवर चक्राकार वारे वाहत आहेत. राज्यात आकाश निरभ्र होत आहे. यातच किमान तापमानात वाढ झाल्याने गारठा कमी झाला असून, दुपारच्या वेळी उन्हाचा कायम आहे.

उत्तरेकडील राज्यांमध्येही थंडी कमी अधिक होत आहे. हरियानातील हिस्सार येथे सोमवारी (ता. २८) सकाळपर्यंतच्या २४ तासांमध्ये देशाच्या सपाट भूभागावरील सर्वांत निचांकी ६.३ अंश सेल्सिअस तापमानाची नोंद झाली. तर विदर्भातील गोंदिया येथे राज्यातील निचांकी ९.६ अंश सेल्सिअस, तर धुळे येथील कृषी महाविद्यालयात १० अंश सेल्सिअस तापमानाची नोंद झाली.

उर्वरित राज्यात किमान तापमानातील वाढ कायम असून, बहुतांशी ठिकाणी पारा ११ ते २४ अंशांच्या दरम्यान आहे. तर कमाल तापमान २८ ते ३५ अंश सेल्सिअसच्या आसपास कायम आहे. राज्याच्या उत्तरेकडील भागात गारठा जाणवत आहे. राज्यात आज (ता. २९) राज्यात मुख्यतः कोरड्या हवामानासह किमान आणि कमाल तापमानात चढ-उतार होण्याचा अंदाज हवामान विभागाने वर्तविला आहे.

--चौकट--

सोमवारी (ता. २८) सकाळपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात किमान तापमान (अंश सेल्सिअसमध्ये) :

पुणे ३१.९ (१७.१), जळगाव ३१.८ (१२.७), धुळे ३०.५ (१०.०), कोल्हापूर ३०.६ (-), महाबळेश्वर २४.४(१६.७), नाशिक ३०.९ (१३.३), निफाड ३०.८ (११.१), सांगली ३१.८(२१.३), सातारा २७.६(२१.३), सोलापूर ३३.८ (२०.०), सांताक्रूझ ३४.३(२०.०), डहाणू २९.८ (१८.०), रत्नागिरी ३२.५ (२३.५), औरंगाबाद ३१.४ (१२.२), नांदेड - (१५.४), उस्मानाबाद - (१७.४), परभणी ३१.४ (१४.५), अकोला ३३.० (१४.०), अमरावती ३२.० (१२.४), बुलढाणा ३०.० (१४.५), ब्रह्मपूरी ३१.२ (१३.०), चंद्रपूर २८.६ (१३.४), गडचिरोली ३१.२(१०.४), गोंदिया २८.६(९.६), नागपूर २९.९ (११.३), वर्धा ३०.९(१२.०), यवतमाळ ३०.० (११.५).