Grampanchyat : नवनिर्मित ग्रामपंचायतींना खर्चाचे अधिकारच नाहीत

अॅग्रोवन वृत्तसेवा
Nandurbar News : धडगाव, जि. नंदुरबार ः खानदेशात मागील पाच ते सहा वर्षांत सातपुडा पर्वत भागात नव्याने २० पेक्षा अधिक ग्रामपंचायती स्थापन झाल्या. परंतु या ग्रामपंचायतींना निधी खर्चाबाबतचे तांत्रिक अधिकारच नाहीत.

यामुळे सरपंचांची कोंडी होत आहे. धडगाव तालुक्यातील तोरणमाळ भागातील नवनिर्मित ४७ ग्रामपंचायतींना आवश्यक ‘एलजीडी कोड’ त्वरित द्यावा, अशी मागणी खडकीचे सरपंच सीताराम नुरला पावरा, झापीच्या सरपंच गीता भारसिंग पावरा, सिंधीदिगरच्या सरपंच सोमाबाई संदीप पावरा यांनी केली.

नंदुरबारमधील धडगाव तालुक्यातील नवनिर्मित ७ ग्रामपंचायतींना एलजीडी कोड
न मिळाल्याने १५ व्या वित्त आयोगाचा निधी विकासकामांसाठी खर्च करण्यास अडचणी येत आहेत.

तोरणमाळ भागातील नवनिर्मित ४७ ग्रामपंचायतींना १५ व्या वित्त आयोगांतर्गत विकासकामांसाठी मंजूर झालेला व मिळालेला निधी खर्च करण्यासाठी ग्रामपंचायतींना आवश्यक असलेला एलजीडी कोड (क्रमांक) देण्यात यावा, अशी मागणी सरपंचांनी केली आहे.

नंदुरबार जिल्हा परिषदेचे मुख्य कार्यकारी अधिकारी रघुनाथ गावडे यांना निवेदन देण्यात आले. या वेळी नंदुरबार जिल्हा परिषदेचे शिक्षण सभापती गणेश पराडके उपस्थित होते.

निवेदनानुसार, राज्य शासनाने मागील वर्षी नोव्हेंबर-डिसेंबर २०२२ मध्ये धडगाव (अक्राणी) तालुक्यातील तोरणमाळ भाग, मांडवी भाग, भुषा भाग, रोषमाळ भागातील तीन ग्रामपंचायतींचे विभाजन करून नव्याने ४७ ग्रामपंचायतींची निर्मिती केली. मात्र आवश्यक एलजीडी कोड
(क्रमांक) त्यांना मिळालेला नाही.

गावे विकासापासून वंचित
तोरणमाळ भागातील खडकी, झापी, फलाई, सिंधीदिगर, कुंड्या, भादल, कैलापाणी, भाबरी, उडद्या भमाणे, सावन्यादिगर, बिलगाव, त्रिशूल, चिखलीबरी, माळ, शेलगदा, गेंदा अशा एकूण ४७ नवीन ग्रामपंचायतींना ग्रामविकास विभागाकडून एलजीडी कोड न मिळाल्याने या ग्रामपंचायतअंतर्गत येणारी गावे विकासकामांपासून वंचित आहेत.