Eknath Shinde : पाणलोट विकासाची अधिकाधिक कामे हाती घ्या ः मुख्यमंत्री शिंदे

मुंबई : ‘‘मृद्‌ व जलसंधारण विभागाने पाणलोट विकासाची (Watershed Work) अधिकाधिक कामे हाती घेऊन स्थानिक सिंचन (Irrigation) क्षमता वाढेल यासाठी प्रयत्न करावेत. यासाठी विभागाचे बळकटीकरण आणि आर्थिक तरतूद यासाठी सर्वतोपरी पाठबळ दिले जाईल,’’ असे मुख्यमंत्री एकनाथ शिंदे (Eknath Shince) यांनी बुधवारी (ता. ७) येथे सांगितले.

जलयुक्त शिवार अभियान पुन्हा गतिमान करण्यासाठी नियोजन करावे असे, निर्देशही मुख्यमंत्र्यांनी दिले. नाले- ओढ्यातील गाळ काढण्याच्या कामांना प्राधान्य देण्याची सूचनाही त्यांनी केली. मृद्‌ व जलसंधारण विभागाची आढावा बैठक मुख्यमंत्री शिंदे यांच्या अध्यक्षतेखाली झाली,

या बैठकीत ते बोलत होते. सह्याद्री राज्य अतिथिगृह येथील बैठकीस मुख्यमंत्र्यांचे प्रधान सचिव विकास खारगे, मृद्‌ व जलसंधारण विभागाचे प्रधान सचिव एकनाथ डवले, जलसंधारण महामंडळाचे अधिकारी आदी उपस्थित होते.

शिंदे म्हणाले, की मृद्‌ व जलसंधारण विभाग शेतकऱ्यांशी निगडित असा आहे. पाण्याची उपलब्धता, नियोजन आणि सिंचन सुविधा हा मोठा जिव्हाळ्याचा विषय आहे. त्यामुळे पाणलोट विकासाची अधिकाधिक कामे हाती घेण्यात यावीत.

यातून स्थानिकरीत्या खात्रीशीर अशी आणि मोठ्या क्षेत्रासाठी सिंचन क्षमता निर्माण होते. जलयुक्त शिवार अभियानातूनही मोठा फायदा झाल्याचे आढळून आले आहे. या अभियानाला गती देण्याचे नियोजन करता येईल. उपलब्ध आर्थिक तरतूद वेळेत आणि दर्जेदार कामांसाठी खर्च होईल यासाठी नियोजन करावे, त्यासाठी क्षेत्रीय यंत्रणा, अभियंते आदींशी समन्वय साधण्यात यावा.