Sugarcane Farming : ऊस शेती प्रशिक्षणाला २० डिसेंबरपासून सुरुवात

पुणे : वसंतदादा शुगर इन्स्टिट्यूटच्या (Vasantdada Sugar Institute) (व्हीएसआय) राज्यव्यापी ‘ऊस शेती ज्ञानयाग’ व ‘ऊस शेती ज्ञानलक्ष्मी’ प्रशिक्षण (Sugarcane Farming Training) शिबिरांना येत्या २० डिसेंबरपासून सुरुवात होत आहे.

ऊस व साखर उत्पादकता वाढविण्यासाठी पुरूष शेतकऱ्यांसाठी ‘ज्ञानयाग’ तसेच महिलांसाठी ‘ज्ञानलक्ष्मी’ असे निवासी प्रशिक्षण उपक्रम गेल्या अनेक वर्षांपासून आयोजित केला जात आहे. महिला शेतकऱ्यांसाठी प्रशिक्षण २० ते २३ डिसेंबर दरम्यान राहील, असे ‘व्हीएसआय’चे महासंचालक संभाजी कडू-पाटील यांनी कळविले.

२७ ते ३० डिसेंबर दरम्यान विदर्भ व कोल्हापूरमधील पुरूष शेतकऱ्यांसाठी ज्ञानयाग असेल. ३ ते ६ जानेवारी सांगली, सातारा, तर १० ते १३ जानेवारी दरम्यान पुणे, नगर, नाशिकसाठी ज्ञानयाग होईल. त्यानंतर शेवटच्या टप्प्यात १७ ते २० जानेवारी दरम्यान सोलापूर, मराठवाडा व खानदेशातील शेतकऱ्यांसाठी ज्ञानयाग भरविला जाईल.

या उपक्रमातून राज्यातील शेतकऱ्यांना ऊसशेतीचे आधुनिक तंत्रज्ञान प्रात्यक्षिकासहित मिळेल. त्यासाठी तीन हजार रुपये प्रशिक्षण शुल्क आकारले जाते. शेतकऱ्यांनी या उपक्रमाच्या माहितीसाठी www.vsisugar.com या संकेतस्थळावर किंवा ०२०-२६९०२२६८, ९८९०४२२२७५ या क्रमांकावर संपर्क साधावा, असे आवाहन कडू-पाटील यांनी केले.