Heavy Rain : सिंधुदुर्गच्या काही भागांना परतीच्या पावसाचा तडाखा

सिंधुदुर्गनगरी ः जिल्ह्याच्या काही भागाला गुरुवारी (ता. २०) सायकांळी उशिरा विजांच्या कडकडाटासह पडलेल्या परतीच्या जोरदार (Heavy Rain With Lightning) पावसाचा तडाखा (Rain Update Sindhudurg) बसला. या पावसामुळे भातपीक कापणी (Paddy Harvesting) केलेल्या शेतकऱ्यांची आवराआवर करताना तारांबळ उडाली. शुक्रवारी (ता. २१) सकाळपासून पावसाने उघडीप दिली.

जिल्ह्यात गेल्या काही दिवसांपासून परतीच्या पाऊस सुरू असून भातपिकाची कापणी रखडली आहे. दरम्यान, जिल्ह्यात गुरुवारी सकाळपासून ढगाळ वातावरण होते. परंतु, सायकांळी उशिरापर्यंत पाऊस पडला नाही; मात्र सायकांळी उशिरा कणकवली तालुक्यात विजांच्या कडकडाटासह परतीच्या पावसाला सुरुवात झाली.

या तालुक्याच्या अनेक भागांना पावसाने अक्षरशः झोडपून काढले. त्यानंतर रात्री वैभववाडी, सावंतवाडी, कुडाळ या तालुक्यात पावसाच्या जोरदार सरी पडल्या. या पावसामुळे भातपिकाची कापणी केलेल्या शेतकऱ्यांची आवराआवर करताना दमछाक झाली. दरम्यान रात्री उशिरापर्यंत पावसाच्या सरी पडत होत्या. शुक्रवारी (ता. २१) सकाळपासून पावसाने उघडीप दिली.