Nagpur News : कीडनाशकांसोबत देण्यात येणाऱ्या माहितिपत्रकावर विविध भाषांमध्ये माहिती नोंदविलेली असते. परिणामी, अत्यावश्‍यक माहितीसाठी पॅकिंगवर पुरेशी जागा मिळावी यासाठी लेबलशी संबंधित माहिती हिंदी आणि इंग्रजी या दोनच भाषांमध्ये नोंदविण्याचा निर्णय केंद्रीय कृषी मंत्रालयस्तरावर घेण्यात आला आहे. अर्थात, ज्या भागात कीडनाशकाची विक्री करायची आहे, तेथील स्थानिक भाषेतच अत्यावश्‍यक माहिती देण्याची पूर्वीची तरतूद आहेच.
केंद्रीय मंत्री नितीन गडकरी यांच्या या संदर्भातील पत्राला कृषिमंत्री नरेंद्रसिंह तोमर यांनी उत्तर देताना हे स्पष्ट केले. शेतकरी संघटनेच्या तंत्रज्ञान व कृषी विज्ञान आघाडीचे प्रमुख मिलिंद दामले यांनी या विषयाकडे गडकरी यांचे लक्ष्य वेधले होते. त्यानंतर गडकरी यांनी या प्रकरणात केंद्रीय कृषी मंत्रालयाने हस्तक्षेप करावा, अशी मागणी केली होती. आता केंद्रीय कृषी मंत्रालयाने कीटकनाशक लेबल प्रकरणात आपली भूमिका स्पष्ट केली आहे.
उत्पादन पॅकिंगवर अत्यावश्‍यक माहितीसाठी पुरेशी जागा मिळण्यासाठी लेबलवरील माहिती देण्यासाठी हिंदी आणि इंग्रजी अशा दोन भाषांची तरतूद करण्यात आली आहे. तथापि, ज्या राज्यात किंवा भागात उत्पादनाची विक्री करण्याचा उद्देश आहे तेथे शिफारशीत पिकांमध्ये कीडनाशकाची मात्रा, वापर, सुरक्षितता आदी अत्यावश्‍यक माहिती संबंधित प्रादेशिक भाषेतच देणे बंधनकारक आहे.
माहिती देण्यासाठीचा फॉन्ट आकार ८ किंवा २ मिमी असावा असे आधीच निर्देशित आहे. या तरतुदीची देखील प्रभावीपणे अंमलबजावणी केली जाईल. केंद्रीय कृषी मंत्रालयाने केंद्रीय कीटकनाशक मंडळ व नोंदणीकरण समिती (सीआयबीआरसी) सल्लामसलत करून त्याआधारे हा निर्णय घेतला असल्याचेही केंद्रीय मंत्रालयाने गडकरी यांना लिहिलेल्या पत्रात स्पष्ट केले आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.